యువ రెజ్లర్ చెంప చెళ్లుమనిపించిన బీజేజీ ఎంపీ ( వైరల్ వీడియో)

న్యూఢిల్లీ: రెజ్లింగ్ ఫెడరేషన్ ఆఫ్ ఇండియా ప్రెసిడెంట్, బీజేపీ ఎంపీ బ్రిజ్ భూషణ్ శరణ్ సింగ్ ఓ యువ రెజ్లర్‌పై చేయిచేసుకున్నారు. కోపాన్ని అదుపులో ఉంచుకోలేక కుర్రాడి చెంప చెళ్లుమనిపించారు. ప్రస్తుతం దీనికి సంబంధించిన వీడియో నెట్టింట వైరల్‌గా మారింది. ప్రతిపక్షాలు, నెటిజన్లు బీజేపీ ఎంపీ తీరుపై విమర్శలు గుప్పిస్తున్నారు. ఓ బాధ్యాతాయుతమైన పదవిలో ఉన్న వ్యక్తి సహనం కోల్పోయి ఇలా ప్రవర్తించడం బాలేదని ఆగ్రహం వ్యక్తం చేస్తున్నారు.

అసలేం జరిగిందంటే.. ఝార్ఖండ్​‌లో రాంచీ వేదికగా అండర్-15 నేషనల్ రెజ్లింగ్​ పోటీలు నిర్వహిస్తున్నారు. అయితే.. కొందరు ఎక్కువ వయస్సు ఉన్నాసరే పోటీల్లో పాల్గొనేందుకు ప్రయత్నించారు. దీంతో నిర్వాహకులు.. దాదాపు 60 నుంచి 70 మందిని పోటీల్లో పాల్గొనకుండా అడ్డుకున్నారు. ఇందులో ఉత్తర్​ప్రదేశ్​కు చెందిన ఓ యువ రెజ్లర్​ తాను క్వాలిఫై కాలేదనే విషయాన్ని తట్టుకోలేకపోయాడు. శుక్రవారం రెజ్లింగ్​ పోటీల చివరిరోజున.. స్టేజ్​పైన ఉన్న బ్రిజ్​ భూషణ్​తో ఏదో చెప్పబోయేందుకు ప్రయత్నించాడు. దీనికి ఆగ్రహించిన బ్రిజ్​ భూషణ్.. యువకుడిని చెంపదెబ్బ కొట్టారు.

ఆ యువ రెజ్లర్ గోండాలోని ఈ బీజేపీ ఎంపీ ట్రైనింగ్ అకాడమీలోనే శిక్షణ పొందాడని ఘటనాంతరం తెలిసింది. అదే విషయం చెప్పే ప్రయత్నం సదరు కుర్ర రెజ్లర్ చేసినట్లు తెలుస్తోంది. ఈ ఘటనపై డబ్ల్యూఎఫ్ సెక్రటరీ వినోద్ తోమర్ మీడియాతో మాట్లాడాడు. 'బాధితుడు డబ్ల్యూఎఫ్​ఐ అధ్యక్షుడు బ్రిజ్ భూషణ్​కు సంబంధించిన కేంద్రంలోనే శిక్షణ పొందాడు. ఈ క్రమంలో అండర్-15 పోటీల్లో పాల్గొనేందుకు సాయం చేయమని కోరేందుకు వచ్చాడు. కానీ, బ్రిజ్​.. అందుకు ఒప్పుకోలేదు. అధిక వయస్సుగలవారు అర్హతలేని పోటీల్లో పాల్గొనకుండా చేయడమే లక్ష్యంగా బ్రిజ్​ పనిచేస్తున్నారు.'ఆయన చెప్పుకొచ్చారు.

యువ రెజ్లర్..​ అధ్యక్షుడు బ్రిజ్​కు కోపం వచ్చేలా చేశాడని వినోద్ పేర్కొన్నారు. అందుకే అతనిపై బ్రిజ్​ చేయిచేసుకున్నారని వివరించారు. 2018 నుంచి డబ్ల్యూఎఫ్​ఐ అండర్-15 రెజ్లింగ్ పోటీలను నిర్వహిస్తోంది. అప్పటినుంచి అర్హతకు మించిన వారు ఈ పోటీల్లో పాల్గొంటున్నారనే ఆరోపణలున్నాయి.