FIFA World Cup 2022 విజయం.. కీలక ప్రకటన చేసిన లియోనల్ మెస్సీ!

రిటైర్మెంట్ లేదు..

తాను జాతీయ ఫుట్ బాల్ జట్టు నుంచి రిటైర్ కావడం లేదని, విశ్వవిజేతగా మరికొన్ని మ్యాచ్‌లు ఆడి..ఛాంపియన్‌గా ఆ అనుభూతిని పొందాలనుకుంటున్నట్లు తెలిపాడు. ఫ్రాన్స్‌తో విజయానంతరం మాట్లాడిన మెస్సీ.. రిటైర్మెంట్‌ ఇప్పట్లో లేదని స్పష్టం చేశాడు.'నేను నా కెరీర్‌ను దీంతో ముగిద్దామని అనుకున్నాను. ఇప్పటి వరకు నా కెరీర్‌లో అందనది ఇదే. ఇకపై నేను ఏమీ అడగను. నేను కోపా సాధించగలిగాను. ఇప్పుడు ప్రపంచకప్‌ కోసం తీవ్రంగా పోరాడాను. నా కెరీర్‌ చరమాంకంలో దీన్ని సాధించాను. కానీ నేను ఫుట్‌బాల్‌ను ప్రేమిస్తాను. ప్రపంచ చాంపియన్‌గా మరికొన్ని గేమ్స్‌ ఆడాలనుకుంటున్నాను'అని మెస్సీ చెప్పుకొచ్చాడు.

కలనుసాకారం...

ఇన్‌స్టాగ్రామ్ వేదికగా ఫిఫా ప్రపంచకప్ విజయంపై మెస్సీ సంతోషం వ్యక్తం చేశాడు. 'ప్రపంచ చాంపియన్‌ కావాలని చాలా సార్లు కలలుగన్నాను. సాధించలేకపోయాను. కానీ, ఇప్పుడు దీన్ని నమ్మలేకపోతున్నా. మమ్మల్ని నమ్మిన వారికి, నాకు మద్దుతు ఇచ్చినవారికి, నా కుటుంబానికి ధన్యవాదాలు. అర్జెంటీనా సమష్టిగా పోరాడితే అనుకొన్న లక్ష్యాన్ని సాధించగలదని మరోసారి నిరూపితమైంది. వ్యక్తుల కంటే ఎక్కువగా ఈ ఘనత జట్టుకే చెందుతుంది. అర్జెంటీనా వాసుల కల కోసం సమష్టిగా పోరాడటంలో ఉన్న బలం ఇది'అని రాసుకొచ్చాడు.

అన్ని టైటిళ్లు గెలిచిన..

ఫిఫా ప్రపంచకప్ టైటిల్ లోటును తీర్చుకున్న మెస్సీ.. కెరీర్‌లో అన్ని ఘనతలను సాధించిన ప్లేయర్‌గా గుర్తింపు పొందాడు. ప్రపంచకప్‌ టోర్నీల్లో రెండుసార్లు గోల్డెన్‌ బాల్‌ అవార్డు అందుకొన్న ఏకైక ఆటగాడు మెస్సీనే. ఏడు సార్లు బాలెన్‌ డి ఓర్‌ అవార్డు అందుకొన్న మెస్సీఅండర్‌ -20 ప్రపంచకప్‌, ఒలింపిక్‌ గోల్డ్‌, కోపా అమెరికా, ఫిఫా ప్రపంచకప్‌ టైటిళ్లు కూడా సాధించాడు.

రికార్డులే రికార్డులు..

ఈ సీజన్‌లో భీకరమైన ఫామ్‌ కనబర్చిన మెస్సీ.. మొత్తం 29 మ్యాచ్‌లు ఆడి 24 గోల్స్‌ చేశాడు. 18 గోల్స్‌కు అసిస్ట్‌ చేయడం విశేషం. అంటే మొత్తం 42 గోల్స్‌లో మెస్సీ పాత్ర ఉంది. ఈ సీజన్‌లో 23 సార్లు ప్లేయర్‌ ఆఫ్‌ ది మ్యాచ్‌లను అందుకొన్నాడు. 8వ సారి బాలెన్‌ డీ ఓర్‌ రేసులో ముందున్నాడు. తాజా ప్రపంచకప్‌లో అత్యధిక మ్యాచ్‌లు(26), అత్యధిక మ్యాన్‌ ఆఫ్‌ ది మ్యాచ్‌(11)లు, అత్యధిక గోల్డెన్‌ బాల్‌ అవార్డు(2)లు పొందిన ఆటగాడిగా పలురికార్డులను తన పేరిట లిఖించుకున్నాడు.