ఇప్పటికే పాంటింగ్ రికార్డు బద్దలు.. ధోనీ రికార్డ్‌పై కన్నేసిన న్యూజిలాండ్ పేసర్! ఇంకో నాలుగు మాత్రమే!

WTC Final 2021: Tim Southee eye on MS Dhonis most sixes record in Tests

హైదరాబాద్: టీమిండియాతో సౌథాంప్టన్‌ వేదికగా జరుగుతున్న ఐసీసీ ప్రపంచ టెస్టు ఛాంపియన్‌షిప్ ఫైనల్లో న్యూజిలాండ్ సీనియర్ బౌలర్ టిమ్ సౌథీ అదరగొడుతున్న విషయం తెలిసిందే. తొలి ఇన్నింగ్స్‌లో బంతితోనే కాకుండా బ్యాట్‌తో కూడా రెచ్చిపోయాడు. ఒక వికెట్‌తో పాటు 46 బంతుల్లో 30 పరుగులు చేశాడు. సౌథీ తన ఇన్నింగ్స్‌లో రెండు సిక్సర్లు, ఒక ఫోర్ బాది.. చివరకు రవీంద్ర జడేజా బౌలింగ్‌‌లో చివరి వికెట్‌గా వెనుదిరిగాడు. 32 పరుగుల తొలి ఇన్నింగ్స్ ఆధిక్యాన్ని కివీస్ అందుకోవడానికి కారణం సౌథీ చేసిన పరుగులే అని ప్రత్యేకంగా చెప్పాల్సిన అవసరం లేదు.

పాంటింగ్‌ రికార్డు బ్రేక్:

టిమ్ సౌథీ టెస్ట్ రికార్డు బాగా ఉంది. బంతితోనే కాకుండా బ్యాట్‌తో కూడా రెచ్చిపోయిన సందర్భాలు చాలానే ఉన్నాయి. ఇప్పటి వరకూ 79 టెస్టులాడిన సౌథీ.. 310 వికెట్లు పడగొట్టాడు. 5 వికెట్లు 12 సార్లు తీశాడు. ఇక బ్యాట్‌తో 87.74 స్ట్రైక్‌రేట్‌తో 1728 పరుగులు కూడా చేశాడు. ఇందులో ఐదు హాఫ్ సెంచరీలు ఉన్నాయి. సౌథీ టెస్టుల్లో మొత్తం 167 ఫోర్లు, 75 సిక్సర్లు బాదాడు. ఛాంపియన్‌షిప్ ఫైనల్ తొలి ఇన్నింగ్స్‌లో రెండు సిక్సర్లు బాదడంతో ఆసీస్ మాజీ కెప్టెన్ రికీ పాంటింగ్‌ను అధిగమించాడు. ఈ మ్యాచుకు ముందువరకు ఇద్దరు 73 సిక్సర్లతో సమానంగా ఉన్నారు.

India vs Sri Lanka: కోచ్ ప్రధాన బాధ్యత అదే.. ద్రవిడ్ ఆ పని చేయగలడు: సచిన్

మరో 4 సిక్సర్లు కొడితే:

టీమిండియా మాజీ కెప్టెన్ ఎంఎస్ ధోనీ టెస్టుల్లో నెలకొల్పిన సిక్సర్ల రికార్డ్‌పై కూడా టిమ్ సౌథీ కన్నేశాడు. కెరీర్‌లో 90 టెస్టులాడిన ధోనీ 78 సిక్సర్లు బాదాడు. సౌథీ మరో 4 సిక్సర్లు కొడితే ధోనీ రికార్డ్ బ్రేక్ కానుంది. ఛాంపియన్‌షిప్ ఫైనల్లో కాకపోయినా.. మరో 2-3 టెస్టుల్లో సౌథీ ఈ ఘనత అందుకోవడం ఖాయం. ఇక టెస్టు క్రికెట్‌లో అత్యధిక సిక్సర్లు కొట్టిన బ్యాట్స్‌మెన్‌గా న్యూజిలాండ్ మాజీ కెప్టెన్ బ్రెండన్ మెక్‌కలమ్ టాప్‌లో ఉన్నాడు. మెక్‌కలమ్ 107 సిక్సర్లు బాదాడు. భారత మాజీ ఓపెనర్ వీరేంద్ర సెహ్వాగ్ 91 సిక్సర్లతో ఐదో స్థానంలో.. ధోనీ 78 సిక్సర్లతో 15వ స్థానంలో ఉన్నారు. సౌథీ మరో నాలుగు సిక్సర్లు కొడితే.. టాప్-15లోకి రానున్నాడు. అప్పుడు ధోనీ 16కి పడిపోతాడు.