'ఫైనల్లో కివీస్‌దే విజయం.. ఇండియాకు ఆ ఇద్దరే దిక్కు!'

T20 World Cup 2026: అహ్మదాబాద్‌లోని నరేంద్ర మోదీ స్టేడియం వేదికగా జరగనున్న టీ20 ప్రపంచకప్ 2026 ఫైనల్ పోరుకు సర్వం సిద్ధమైంది. భారత్, న్యూజిలాండ్ జట్ల మధ్య జరగనున్న ఈ మహా సంగ్రామానికి ముందు పాకిస్థాన్ మాజీ పేసర్ మహమ్మద్ ఆమిర్ తనదైన శైలిలో భారత్‌పై మరోసారి తన అక్కసును వెళ్లగక్కాడు. టీమిండియా కేవలం ఇద్దరు ఆటగాళ్లపైనే ఆధారపడి ఉందని.. ఈ ఫైనల్లో న్యూజిలాండ్ జట్టు విజేతగా నిలుస్తుందని ఆమిర్ అంచనా వేశాడు.

ఆమిర్ అంచనాలు ఎప్పుడూ తప్పే..
ఈ టోర్నీ ఆరంభం నుంచి మహమ్మద్ అమీర్ టీమిండియా ప్రదర్శనపై పెదవి విరుస్తూనే ఉన్నాడు. భారత్ సూపర్-8 దశలోనే ఇంటికి వెళ్తుందని ఆమిర్ మొదట జోస్యం చెప్పాడు. అది తప్పాక.. సెమీఫైనల్‌లో ఇంగ్లండ్ చేతిలో భారత్ ఓడిపోతుందని వాదించాడు. అయితే రోహిత్ సేన అద్భుత ప్రదర్శనతో ఫైనల్‌కు దూసుకురావడంతో ఆమిర్ అంచనాలన్నీ తలకిందులయ్యాయి. ఇప్పుడు ఫైనల్ విషయంలో కూడా ఆయన కివీస్ జట్టుకే మద్దతు తెలపడం గమనార్హం. న్యూజిలాండ్ ఓ సంపూర్ణ జట్టుగా రాణిస్తోందని.. దక్షిణాఫ్రికాపై వారి సెమీఫైనల్ విజయం వారి ఆత్మవిశ్వాసాన్ని రెట్టింపు చేసిందని మహమ్మద్ ఆమిర్ అభిప్రాయపడ్డాడు.

భారత్ బలహీనతలపై ఆమిర్ విశ్లేషణ
టీమిండియా కేవలం సంజూ శాంసన్, జస్ప్రీత్ బుమ్రాల వ్యక్తిగత ప్రదర్శనలపైనే ఆధారపడి ఉందని ఆమిర్ విమర్శించాడు. జస్ప్రీత్ బుమ్రా మినహా మిగిలిన బౌలర్లెవరూ నిలకడగా రాణించడం లేదని.. ముఖ్యంగా వరుణ్ చక్రవర్తి, హార్దిక్ పాండ్యా గత కొన్ని మ్యాచ్‌లుగా ఇబ్బంది పడుతున్నారని ఆమిర్ పేర్కొన్నాడు. మరోవైపు, న్యూజిలాండ్ బౌలింగ్ విభాగం చాలా పటిష్టంగా ఉందని.. అహ్మదాబాద్ పిచ్ పరిస్థితులు కివీస్ బౌలర్లకు మరింత అనుకూలిస్తాయని విశ్లేషించాడు. బ్యాటింగ్ పరంగా రెండు జట్లు బలంగా ఉన్నప్పటికీ.. బౌలింగ్ విషయంలో కివీస్‌దే పైచేయి అని ఆయన స్పష్టం చేశాడు.

కీలక ఆటగాళ్లు
ఈ ఫైనల్‌లో న్యూజిలాండ్ కెప్టెన్ మిచెల్ శాంట్నర్ అత్యంత ప్రభావవంతమైన ఆటగాడిగా నిలుస్తాడని ఆమిర్ అంచనా వేశాడు. శాంట్నర్ తన స్పిన్ మాయాజాలంతో భారత బ్యాటర్లను కట్టడి చేయగలడని ఆమిర్ నమ్ముతున్నాడు. అయితే భారత ఆల్‌రౌండర్ హార్దిక్ పాండ్యాపై కూడా ఆమిర్ ఆసక్తికర వ్యాఖ్యలు చేశాడు. హార్దిక్ ప్రస్తుతం ఫామ్‌లో లేకపోయినా, ఇలాంటి పెద్ద మ్యాచ్‌ల్లో చెలరేగిపోయే సత్తా అతనికి ఉందని, ఫామ్ తిరిగి పొందేందుకు ఇది అతనికి గొప్ప వేదిక అని ఆమిర్ అభిప్రాయపడ్డాడు.

చరిత్ర సృష్టించే దిశగా భారత్
మహమ్మద్ ఆమిర్ విమర్శలను, అంచనాలను పటాపంచలు చేస్తూ భారత్ గనుక ఈ ఫైనల్‌లో నెగ్గితే, ప్రపంచ క్రికెట్‌లో సరికొత్త చరిత్ర సృష్టించనుంది. టీ20 ప్రపంచకప్ టైటిల్‌ను వరుసగా రెండుసార్లు గెలిచి, తమ టైటిల్‌ను నిలబెట్టుకున్న తొలి జట్టుగా టీమిండియా రికార్డుకెక్కుతుంది. అంతేకాకుండా సొంత గడ్డపై టీ20 ప్రపంచకప్‌ను ముద్దాడిన మొదటి జట్టుగా కూడా భారత్ చరిత్ర పుటల్లో నిలుస్తుంది. కోట్లాది మంది అభిమానులు ఇప్పుడు మహమ్మద్ ఆమిర్ మాటలు తప్పని నిరూపించాలని కోరుకుంటున్నారు.