RR vs PBKS: చెలరేగిన దీపక్ హుడా, రాహుల్.. వాంఖడేలో సిక్సర్ల వర్షం.. రాజస్థాన్ ముందు భారీ లక్ష్యం!

జిగేల్..

టాస్ ఓడి బ్యాటింగ్‌కు దిగిన పంజాబ్ కింగ్స్‌.. ఆదిలోనే ఓపెనర్ మయాంక్ అగర్వాల్(14) వికెట్ కోల్పోయినా.. మంచి శుభారంభం దక్కింది. మరో ఓపెనర్ కేఎల్ రాహుల్, యూనివర్స్ బాస్ క్రిస్ గేల్ ఇన్నింగ్స్‌ను ముందుకు నడిపించడంతో పవర్ ప్లే ముగిసే సరికి పంజాబ్ కింగ్స్ వికెట్ నష్టానికి 46 రన్స్ చేసింది. అనంతరం జోరు పెంచిన ఈ జోడి స్కోర్ బోర్డును పరుగెత్తించింది. అయితే కేఎల్ రాహుల్, క్రిస్ గేల్ ఇచ్చిన సునాయస క్యాచ్‌లను రాజస్థాన్ ఫీల్డర్లు నేలపాలు చేశారు. ఈ అవకాశాలను అందిపుచ్చుకున్న ఈ ఇద్దరూ విజృంభించారు. ప్రమాదకరంగా మారిన ఈ జోడీని రియాన్ పరాగ్ విడదీసాడు. క్రిస్ గేల్‌ను క్యాచ్ ఔట్‌గా పెవిలియన్ చేర్చాడు.

హుడా విధ్వంసం..

అనంతరం క్రీజులోకి వచ్చిన దీపక్ హుడా.. సెట్ అవ్వడానికి టైమ్ తీసుకున్నా.. ఆ తర్వాత ఆకాశమే హద్దుగా చెలరేగాడు. దూబే వేసిన 13 ఓవర్‌లో సిక్సర్‌తో కేఎల్ రాహుల్ హాఫ్ సెంచరీ పూర్తి చేసుకోగా..దీపక్ హుడా రెండు భారీ సిక్సర్లు కొట్టాడు. దాంతో ఆ ఓవర్‌లో 20 రన్స్ వచ్చాయి. ఆ తర్వాత ప్రతీ ఓవర్‌కు సిక్స్ కొట్టిన ఈ జోడీ రాజస్థాన్ బౌలర్లకు చుక్కలు చూపించింది. ఇక క్రిస్ మోరిస్ వేసిన 16 ఓవర్‌లో సిక్స్ , సింగిల్ తీసిన దీపక్ హుడా 20 బంతుల్లో హాఫ్ సెంచరీ పూర్తి చేసుకున్నాడు. అనంతరం మరింత ధాటిగా ఆడిన అతను మోరిస్ బౌలింగ్‌లోనే క్యాచ్ ఔట్‌గా పెవిలియన్ చేరాడు. దాంతో మూడో వికెట్‌కు నమోదైన 105 పరుగుల భాగస్వామ్యానికి తెరపడింది.

సకారియా స్టన్నింగ్ క్యాచ్..

క్రీజులోకి నికోలస్ పూరన్ రాగా.. రాహుల్ మూమెంటమ్‌ను కొనసాగించాడు. మరసటి బంతినే భారీ సిక్సర్ కొట్టడంతో పంజాబ్ 17.4 ఓవర్లలోనే 200 మార్క్ అందుకుంది. అదే ఓవర్ ఆఖరి బంతికి పూరన్ ఫైన్ లెగ్ మీదుగా షాట్ ఆడగా.. చేతన్ సకారియా సూపర్ డైవ్‌తో అద్భుత క్యాచ్ అందుకున్నాడు. తర్వాత షారూఖ్ ఖాన్ క్రీజులోకి రాగా.. రాహుల్ జోరును కొసాగిచాడు. ముస్తాఫిజుర్ వేసిన 19వ ఓవర్‌లో 15 పరుగులు పిండుకున్నాడు. ఇక చివరి ఓవర్ ఫస్ట్ బాల్‌ను బౌండరీ తరలించిన రాహుల్.. సెకండ్ బాల్‌ను భారీ షాట్ ఆడగా.. బౌండరీ లైన్ వద్ద రాహుల్ తెవాటియా సూపర్ క్యాచ్‌తో ఆకట్టుకున్నాడు. దాంతో రాహుల్ సెంచరీ చేయకుండానే వెనుదిరిగాడు. ఆఖరి బంతికి జయ్ రిచర్డ్ సన్ క్యాచ్ ఔట్‌గా వెనుదిరగడంతో పంజాబ్ 221 పరుగులకు పరమితమైంది.