IPL 2018, RR vs KKR: ఐపీఎల్ చరిత్రలోనే తొలిసారి (వీడియో)

రాజస్థాన్‌పై అలవోక విజయం

బుధవారం రాత్రి జరిగిన మ్యాచ్‌లో కోల్‌కతా నైట్‌రైడర్స్‌ 7 వికెట్ల తేడాతో రాజస్థాన్‌ రాయల్స్‌పై ఘన విజయం సాధించింది. టాస్‌ ఓడి ముందుగా బ్యాటింగ్‌కు దిగిన రాజస్థాన్‌ 20 ఓవర్లలో 8 వికెట్లకు 160 పరుగులు చేసింది. షార్ట్‌ (43 బంతుల్లో 5 ఫోర్లు, 1 సిక్స్‌తో 44), రహానె (19 బంతుల్లో 5 ఫోర్లు, 1 సిక్స్‌తో 36) మాత్రమే రాణించారు. నితీష్ రాణా, కరాన్‌ రెండేసి వికెట్లు తీశారు.

18.5 ఓవర్లలో మూడు వికెట్లకు 163 పరుగులు

అనంతరం చేధనకు దిగిన కోల్‌కతా 18.5 ఓవర్లలో మూడు వికెట్లకు 163 పరుగులు చేసి విజయం సాధించింది. రాబిన్‌ ఊతప్ప (36 బంతుల్లో 6 ఫోర్లు, 2 సిక్సర్లతో 48), సునీల్‌ నరైన్‌ (25 బంతుల్లో 5 ఫోర్లు, 1 సిక్స్‌తో 35) శుభారంభం చేయగా నితీష్‌ రాణా (27 బంతుల్లో 2 ఫోర్లు, 1 సిక్స్‌తో 35 నాటౌట్‌), దినేశ్‌ కార్తీక్‌ (23 బంతుల్లో 2 ఫోర్లు, 2 సిక్సర్లతో 42 నాటౌట్‌) చివర్లో చెలరేగారు.

పరుగులు తీసేందుకు ఇబ్బందిపడ్డ రాజస్థాన్ బ్యాట్స్‌మెన్‌

ఈ మ్యాచ్‌లో తొలుత బ్యాటింగ్‌కు దిగిన రాజస్థాన్‌ ఇన్నింగ్స్‌ ఆరంభం నుంచే నిదానంగా సాగింది. కోల్‌కతా బౌలింగ్‌కు పరుగులు తీసేందుకు బ్యాట్స్‌మెన్‌ ఇబ్బందిపడ్డారు. తొలి మూడు ఓవర్ల వరకు ఒక్క బౌండరీ కూడా లేదు. అప్పటికి స్కోరు కేవలం 9 పరుగులే. అయితే నాలుగో ఓవర్‌లో కెప్టెన్‌ రహానె వరుసగా నాలుగు ఫోర్లతో చెలరేగి ఒక్కసారిగా ఊపు తెచ్చాడు. ఆ తర్వాత కూడా ఓ సిక్స్‌, ఫోర్‌తో ఆకట్టుకున్నా ఏడో ఓవర్‌లో అతడిని కీపర్‌ కార్తీక్‌ మెరుపు వేగంతో స్టంపౌట్‌ చేశాడు.

శివమ్‌ మావి బౌలింగ్‌లో ఔటైన సంజూ శాంసన్

ఆ తర్వాత బెంగళూరుపై దుమ్మురేపిన శాంసన్‌ (7) శివమ్‌ మావి బౌలింగ్‌లో ఔటయ్యాడు. ఊపు మీదున్న షార్ట్‌ 12వ ఓవర్‌లో వరుసగా 6,4తో ఆకట్టుకున్నాడు. కానీ 13వ ఓవరల్‌ రాణా అతడిని బౌల్డ్‌ చేయగా మరుసటి ఓవర్‌లో స్పిన్నర్‌ కుల్దీప్‌ యాదవ్‌.. త్రిపాఠి (15) పెవిలియన్‌కు చేర్చాడు. ఎప్పటిలాగే స్టోక్స్‌ (14) మరోసారి నిరాశపరచగా చివర్లో బట్లర్‌ (24 నాటౌట్‌) రాణించడంతో రాజస్థాన్‌ 20 ఓవర్లలో 8 వికెట్లకు 160 పరుగులు చేసింది.

తొలి ఓవర్ లోనే క్రిస్‌లిన్ వికెట్ కోల్పోయిన కోల్‌కతా

ఆ తర్వాత తొలి ఓవర్‌లోనే కోల్‌కతా క్రిస్ లిన్‌ వికెట్‌ కోల్పోయింది. కానీ ఆ తర్వాత క్రీజులోకి వచ్చిన ప్రతీ బ్యాట్స్‌మన్‌ తమ వంతుగా రాణించి విజయంలో కీలక పాత్ర పోషించారు. నరైన్‌, ఊతప్ప జోడీ వరుస బౌండరీలతో స్కోరును కదం తొక్కించింది. నాలుగో ఓవర్‌లో నరైన్‌ హ్యాట్రిక్‌ ఫోర్లతో చెలరేగగా.. ఆ తర్వాత ఓవర్‌లో ఊతప్ప సైతం మూడు ఫోర్లు బాదాడు.

మరో ఏడు బంతులుండగానే కోల్‌కతా విజయం

తొమ్మిది ఓవర్ల పాటు వీరిద్దరూ ఎలాంటి ఇబ్బంది లేకుండా రాజస్థాన్‌ బౌలర్లను ఎదుర్కొంటూ పరుగులు వరద సాధించారు. అయితే లేని పరుగు కోసం వెళ్లిన నరేన్ రనౌట్‌ అయ్యాడు. దీంతో రెండో వికెట్‌కు 69 పరుగుల భాగస్వామ్యం ముగిసింది. ఆ తర్వాత కొద్దిసేపటికే ఊతప్ప లాంగ్‌ ఆన్‌లో భారీ షాట్‌ ఆడగా బౌండరీ లైన్‌ దగ్గర స్టోక్స్‌ క్యాచ్‌ అందుకున్నాడు. 17వ ఓవర్‌లో దినేశ్‌ కార్తీక్‌, రాణా చెరో సిక్సర్‌తో 16 పరుగులు రాబట్టారు. ఇక చివరి 18 బంతుల్లో 19 పరుగులు రావాల్సి ఉండగా మరో ఏడు బంతులుండగానే కోల్‌కతా విజయం సాధించింది.