'ఆ మ్యాచ్‌కు 30 నిమిషాల కామెంటరీ అనుకుంటే.. 90 నిమిషాలు అయ్యింది'

నా కామెంటరీల్లో అదొక ఫేవరెట్‌:

2019 వన్డే ప్రపంచకప్ మెగా ఫైనల్‌ జ్ఞాపకాల్ని న్యూజిలాండ్‌ కామెంటేటర్‌ ఇయాన్‌ స్మిత్‌ తాజాగా గుర్తు చేసుకున్నాడు. తాజాగా భారత‌ కామెంటేటర్‌ హర్షా భోగ్లేతో ఇన్‌సైడ్‌ ఔట్ కార్యక్రమంలో ఇయాన్‌ స్మిత్‌ మాట్లాడుతూ... '2019 వన్డే ప్రపంచకప్ ఫైనల్ నా ఫేవరెట్‌ కామెంటరీల్లో ఒకటి. గతంలో ఎప్పుడూ చూడని ఫైనల్‌ మ్యాచ్ అది. ఇక ముందు కూడా ఈ తరహా ఫైనల్‌ జరుగుతుందని నేను అస్సలు అనుకోవడం లేదు' అని అన్నాడు. న్యూజిలాండ్‌ మాజీ క్రికెటర్ అయిన స్మిత్ ఆ దేశం తరఫున 63 టెస్టులు, 98 వన్డేలు ఆడాడు.

30 నిమిషాలు అనుకుంటే:

'ఫైనల్ మ్యాచ్‌లో నేను కామెంటరీ బాక్సులో కూర్చొని ఉన్నా. ఇంకా ఏడు ఓవర్లు ఉన్నాయి. వాటికి 30 నుంచి 35 నిమిషాలు సమయం పడుతుంది. కానీ ఆ మ్యాచ్‌ 90 నిమిషాలు పాటు జరిగింది. ఆ ఏడు చివరి ఓవర్‌లతో పాటు రెండు సూపర్‌ ఓవర్‌లు జరగడంతో 30 నిమిషాల మ్యాచ్‌.. 90 నిమిషాలకు వెళ్లింది. ఆ కామెంటరీ కాంపిటేషన్‌లా సాగలేదు, ఒక కాంబినేషన్‌లా సాగింది. మేమంతా ఒక మంచి కామెంటరీని ప్రజలకు ఇవ్వడానికి సాధ్యమైనంతవరకూ కృషి చేశాం' అని ఇయాన్‌ స్మిత్‌ తెలిపాడు.

బౌండరీ కౌంట్ ఆధారంగా:

లార్డ్స్ వేదికగా 2019 జులై 14న జరిగిన ప్రపంచకప్ ఫైనల్లో ఇంగ్లండ్ చేతిలో న్యూజిలాండ్ ఓడిపోయిన సంగతి తెలిసిందే. ఈ మ్యాచ్‌లో టాస్ గెలిచి తొలుత బ్యాటింగ్ చేసిన న్యూజిలాండ్ నిర్ణీత 50 ఓవర్లలో 8 వికెట్లు కోల్పోయి 241 పరుగులు చేసింది. అనంతరం 242 పరుగుల విజయ లక్ష్యంతో బరిలోకి దిగిన ఇంగ్లండ్ సైతం నిర్ణీత 50 ఓవర్లలో 241 పరుగులే చేయడంతో మ్యాచ్ టైగా ముగిసింది. దీంతో మ్యాచ్ సూపర్ ఓవర్‌కు దారి తీసింది. సూపర్ ఓవర్‌లో తొలుత బ్యాటింగ్ చేసిన ఇంగ్లండ్ ఆరు బంతుల్లో 15 పరుగులు చేసింది. అనంతరం 16 పరుగుల విజయలక్ష్యంతో బరిలోకి దిగిన న్యూజిలాండ్ సైతం ఆరు బంతుల్లో వికెట్ నష్టపోయి అదే 15 పరుగులు చేసింది. దీంతో సూపర్ ఓవర్ కూడా టై అయింది. చివరకు బౌండరీల ఆధారంగా ఇంగ్లండ్‌ను విశ్వవిజేతగా ప్రకటించారు.

'బ్లాక్‌ లైవ్స్‌ మ్యాటర్‌'కు మద్దతుగా.. వెస్టిండీస్ జట్టు వినూత్న నిర్ణయం!!