మోర్గాన్, స్టోక్స్..
24 బంతుల్లో 53 పరుగులు కావాల్సిన దశలో మోర్గాన్, స్టోక్స్ విరుచుకుపడ్డారు. కళ్లు చెదిరే షాట్లతో 17, 18, 19 ఓవర్లలో కలిపి 52 పరుగులు రాబట్టారు. ఈక్రమంలో స్టోక్స్ అవుటైనా దూకుడు ఆపని మోర్గాన్ వరుస సిక్సర్లతో సౌతాఫ్రికా బౌలర్లను బెంబేలెత్తించాడు. దీంతో ఈ పోరులో ఐదు వికెట్లతో సులువుగా గెలుపొందిన ఇంగ్లండ్ జట్టు 2-1తో సిరీస్ కైవసం చేసుకుంది.
చెలరేగిన క్లాసెన్..
ఇక ఈ మ్యాచ్లో టాస్ నెగ్గి తొలుత బ్యాటింగ్ చేసిన సౌతాఫ్రికా 20 ఓవర్లలో 6 వికెట్లకు 222 పరుగులు చేసింది. క్లాసెన్ (33 బంతుల్లో 4 ఫోర్లు, 4 సిక్సర్లతో 66) హాఫ్ సెంచరీ చేశాడు. బవుమా (24 బంతుల్లో 4 ఫోర్లు, 3 సిక్సర్లతో 49), డి కాక్ (24 బంతుల్లో ఫోర్, 4 సిక్సర్లతో 35), మిల్లర్ (20 బంతుల్లో 3 ఫోర్లు, 2 సిక్సర్లతో 35 నాటౌట్) తలో చేయి వేశారు. కర్రాన్, స్టోక్స్ చెరో రెండో వికెట్లు పడగొట్టారు.
మార్చి 25న ఐపీఎల్ ఆల్స్టార్ గేమ్.. కోహ్లీ, రోహిత్ ఒక్కటీమ్లోనే.. కెప్టెన్గా ధోని!
ఐదు బంతులు మిగిలుండగానే..
223 పరుగుల భారీ లక్ష్య ఛేదనలో ఓపెనర్ జేసన్ రాయ్ (7) వికెట్ను ఇంగ్లండ్ త్వరగా కోల్పోయింది. కానీ బెయిర్ స్టో (34 బంతుల్లో 7 ఫోర్లు, 3 సిక్సర్లతో 64), కెప్టెన్ మోర్గాన్ (22 బంతుల్లో 7 సిక్సర్లతో 57 నాటౌట్), బట్లర్ (29 బంతుల్లో 9 ఫోర్లు, 2 సిక్సర్లతో 57) చెలరేగారు. వారికి స్టోక్స్ (12 బంతుల్లో ఫోర్, 2 సిక్సర్లతో 22) ధాటి ఇన్నింగ్స్ తోడుకావడంతో ఇంకా ఐదు బంతులు మిగిలి ఉండగానే ఇంగ్లండ్ 226/5 స్కోరుతో విజయాన్ని అందుకుంది. ప్లేయర్ ఆఫ్ ది మ్యాచ్, ప్లేయర్ ఆఫ్ ది సిరీస్ అవార్డులు మోర్గాన్కే దక్కాయి.
ఘన ముగింపు..
ఈ గెలుపుతో ఇంగ్లండ్ రెండు నెలల సౌతాఫ్రికా పర్యటనను ఇంగ్లండ్ ఘనంగా ముగించింది. టెస్ట్ సిరీస్ 3-1తో, టీ20 సిరీస్ను 2-1తో గెల్చుచుకున్న ఇంగ్లండ్.. వన్డే సిరీస్ను మాత్రం 1-1తో సమం చేసుకుంది.