9 సిక్సులు, 6 ఫోర్లు
అబుదాబీ టీ10 టోర్నమెంట్లో భాగంగా బుధవారం షేక్ జాయెద్ క్రికెట్ స్టేడియంలో మరాఠా అరేబియన్స్, టీమ్ అబుదాబీ జట్ల మ్యాచ్ జరిగింది. టీమ్ అబుదాబీ తరఫున బరిలోకి దిగిన యూనివర్సల్ బాస్ క్రిస్ గేల్.. విధ్వంసం సృష్టించాడు. 22 బంతుల్లోనే ఏకంగా 9 సిక్సులు, 6 ఫోర్ల సాయంతో 84 రన్స్ చేశాడు. కేవలం 12 బంతుల్లోనే హాఫ్ సెంచరీ పూర్తి చేసుకున్న గేల్.. టీ10 చరిత్రలో ఫాస్టెస్ట్ హాఫ్ సెంచరీ చేసిన మహమ్మద్ షెహజాద్ రికార్డును సమం చేశాడు. 2018 సీజన్లో షెహజాద్ రాజ్పుత్స్ జట్టు తరఫున ఆడి 12 బంతుల్లోనే అర్ధ శతకం చేశాడు.
రాణించిన హఫీజ్
ఈ మ్యాచ్లో మొదట బ్యాటింగ్ చేసిన మరాఠా అరేబియన్స్ జట్టు నిర్ణీత 10 ఓవర్లలో 4 వికెట్లకు 97 పరుగులు చేసింది. ఓపెనర్ ముక్తర్ అలీ (14) విఫలం అయినా.. మరో ఓపెనర్ అలీషన్ షరాఫు (33) రాణించాడు. 23 బంతుల్లో 33 రన్స్ చేశాడు. పాకిస్తాన్ వెటరన్ ఆటగాళ్లు మొహ్మద్ హఫీజ్ (20), షోయబ్ మాలిక్ (15) పర్వాలేదనిపించారు. టీమ్ అబుదాబీ పేసర్ టామ్ హెల్మ్ అద్భుతంగా బౌలింగ్ చేశాడు. తన కోటా రెండు ఓవర్లలో 8 పరుగులే ఇచ్చాడు. ఒక మెయిడిన్ వేయడం విశేషం. ఓబేడ్ మెక్కాయ్ రెండు వికెట్లు పడగొట్టాడు.
నలువైపులా హిట్టింగ్తో మోతెక్కించాడు
లక్ష్య ఛేదనలో క్రిస్ గేల్ విధ్వంసంతో టీమ్ అబుదాబీ జట్టు 5.3 ఓవర్లలోనే విజయాన్ని అందుకుంది. గేల్ చేసిన 84 పరుగుల్లో 78 రన్స్ బౌండరీల రూపంలోనే రావడం విశేషం. 381 స్ట్రయిక్ రేట్తో అతడు పరుగులు చేశాడు. క్రీజులోకి వచ్చాక తొలి ఓవర్ నుంచి గేల్ రెచ్చిపోయాడు. తన మార్క్ హిట్టింగ్తో ప్రత్యర్థి బౌలర్లను బెంబేలెత్తించాడు. మైదానం నలువైపులా హిట్టింగ్తో మోతెక్కించాడు. యామిన్ అహ్మద్జాయ్ వేసిన తొలి ఓవర్లో వరుసగా మూడు ఫోర్లు, ఓ సిక్స్ బాదిన గేల్ 18 పరుగులు రాబట్టాడు.
మరో మ్యాచ్ గెలిస్తే
రెండో ఓవరలో మరో ఓపెనర్ పాల్ స్టిర్లింగ్ తొలి రెండు బంతులను బౌండరీలుగా మలిచాడు. అదే ఓవర్లో క్రిస్ గేల్ వరుసగా మూడు సిక్సులు బాదడంతో.. 27 పరుగులొచ్చాయి. తర్వాతి ఓవర్లో స్టిర్లింగ్ ఔట్ అయినా.. గేల్ రెండు ఫోర్లు, రెండు సిక్సులు బాదాడు. నాలుగో ఓవర్లో రెండు సిక్సులు, ఐదవ ఓవర్లో ఫోర్, ఆరో ఓవర్లో సిక్స్ బాది మ్యాచ్ ముగించాడు. గేల్కు 'మ్యాన్ ఆఫ్ ది మ్యాచ్' అవార్డు దక్కింది. ఈ మ్యాచ్ గెలుపుతో పాయింట్ల పట్టికలో అబుదాబి పాయింట్ల పట్టికలో నాలుగో స్థానానికి చేరింది. ఐదు మ్యాచ్ల్లో రెండు మాత్రమే గెలిచిన ఆ జట్టుకు గేల్ కీలకమైన సమయంలో విజయాన్ని అందించాడు. లీగ్ దశలో మిగిలిన ఒక్క మ్యాచ్ను గెలిస్తే టీమ్ అబుదాబి ఇక ప్లేఆఫ్స్కు చేరుతుంది.
మళ్లీ టీ20 క్రికెట్ ఆడాలనుకుంటున్నా.. మనసులో మాట బయటపెట్టిన రూట్!!