జడేజా రెండు క్యాచ్‌లు వదిలేసినా: అంతే ప్రశాంతంగా ధోని (వీడియో)

తోలి ఓవర్‌లోనే వికెట్ కోల్పోయిన కోల్‌కతా

దీంతో ఈ మ్యాచ్‌లో టాస్‌ ఓడి బ్యాటింగ్‌కు దిగిన చెన్నై నిర్ణీత 20 ఓవర్లలో 5 వికెట్ల నష్టానికి 177పరుగులు చేసింది. అనంతరం 178పరుగుల లక్ష్య ఛేదనలో భాగంగా బరిలోకి దిగిన కోల్‌కతా తొలి ఓవర్‌లోనే క్రిస్ లిన్‌ వికెట్‌ కోల్పోయింది. ఆ తర్వాత ఆసిఫ్‌ వేసిన మరుసటి ఓవర్‌లో మరో ఓపెనర్‌ సునీల్‌ నరైన్‌ వరుసగా ఇచ్చిన రెండు క్యాచ్‌లను జడేజా నేలపాలు చేశాడు.

నేరుగా వెళ్లి జడేజా చేతిలో పడిన బంతి

చెన్నై బౌలర్ ఆసీఫ్ వేసిన రెండో ఓవర్ ఐదో బంతిని మరో భారీ షాట్ ఆడగా అది నేరుగా వెళ్లి జడేజా చేతిలో పడింది. ఎంతో సులువైన క్యాచ్‌ను జడేజా వదిలేశాడు. అనంతరం జడేజా ఫీల్డింగ్ చేస్తున్న దిశగానే నరైన్ తర్వాతి బంతిని మరో షాట్ బాదాడు. తన మీదుగా వెళ్తున్న బంతిని జడేజా గాల్లోకి ఎగిరి అందుకోబోయి మరోసారి జారవిడిచాడు.

స్కోరుబోర్డుని పరిగెత్తించిన నరైన్

ఈ అవకాశాన్ని సద్వినియోగం చేసుకొని నరైన్‌(32; 20 బంతుల్లో 4 ఫోర్లు, 2 సిక్సులు) స్కోరుబోర్డును ముందుండి నడిపించి కోల్‌కతాకు మంచి ఆరంభాన్నిచ్చాడు. నరైన్ వ్యక్తిగత స్కోరు 6 వద్ద ఉన్నప్పుడు జడ్డూ వరుసగా రెండు క్యాచ్‌లు వదిలేయడం... గెలిచే అవకాశాలున్న మ్యాచ్‌ను చెన్నై చేజార్చుకుందని అభిమానులు అంటున్నారు.

జడేజాను మందలించని ధోని

ఈ రెండు క్యాచ్‌లను వదిలేసిన జడేజాను ధోనీ ఏమాత్రం మందలించలేదు. ఎలాంటి ఆగ్రహానికి లోనుకాకుండా ప్రశాంతంగానే తన పని తాను చేసుకుపోయాడు. ఈ సీజన్‌లో ఇప్పటివరకు ఎనిమిది మ్యాచ్‌లాడిన జడేజా అటు బ్యాటింగ్‌లోనూ, ఇటు బౌలింగ్‌లోనూ చెప్పుకోదగ్గ ప్రదర్శన చేయలేదు. అయినా వరుసగా ఎనిమిది మ్యాచ్‌లాడాడు. ధోనీ కారణంగానే జడేజా జట్టులో ఉంటున్నాడని సోషల్ మీడియాలో నెటిజన్లు అంటున్నారు.