భారీ సిక్స్ కొట్టినా.. బంతిని చూడని సుందర్! అచ్చం ధోనీలానే! (వీడియో)

సుందర్‌ హాఫ్ సెంచరీ

ఒక ద‌శ‌లో 186 ప‌రుగుల‌కే 6 వికెట్లు కోల్పోయి క‌ష్టాల్లో ప‌డిన టీమ్‌ను.. టీమిండియా ఆల్‌రౌండర్‌లు వాషింగ్టన్‌ సుందర్‌ (144 బంతుల్లో 62; 7 ఫోర్లు, 1 సిక్స్‌), శార్దూల్‌ ఠాకూర్‌ (115 బంతుల్లో 67; 9 ఫోర్లు, 2 సిక్స్‌లు) ఆదుకున్నారు. ఇద్దరూ ఏడో వికెట్‌కు విలువైన 123 పరుగుల భాగస్వామ్యాన్ని నమోదు చేశారు. ఫలితంగా భారత్‌ తన తొలి ఇన్నింగ్స్‌లో 336 పరుగులు చేసి ఆలౌట్‌ అయింది. ఇద్ద‌రూ ఆసీస్ బౌల‌ర్ల‌పై ఎదురుదాడికి హాఫ్ సెంచ‌రీలు పూర్తి చేసుకున్నారు. ముఖ్యంగా తొలి టెస్ట్ ఆడుతున్న సుంద‌ర్.. అద్భుత‌మైన ప్ర‌ద‌ర్శ‌న చేశాడు.

మహీను గుర్తుచేశాడు

వాషింగ్టన్‌ సుందర్‌ తన ఇన్నింగ్స్‌లో 7 ఫోర్లు, 1 సిక్స్ బాదాడు. హాఫ్ సెంచరీ అనంతరం స్పిన్నర్ నాథన్ లైయాన్ బౌలింగ్‌లో మిడ్-ఆన్ దిశగా భారీ సిక్స్ బాదాడు. అయితే సిక్స్ బాదిన అనంతరం సుందర్‌ బంతివైపే చూడలేదు. కచ్చితంగా సిక్స్ వెళుతుందనే నమ్మకంతో ఉన్నాడు. టీమిండియా మాజీ కెప్టెన్ ఎంఎస్ ధోనీ కూడా షాట్ ఆడిన అనంతరం బంతివైపు చూసేవాడు కాదు. అతని షాట్‌పై అంత నమ్మకంగా ఉండేవాడు. సుందర్ కూడా అచ్చు మహీలానే ధీమాగా ఉన్నాడు. సుందర్ సిక్సుకు సంబందించిన వీడియో సోషల్ మీడియాలో చక్కర్లు కొడుతోంది. 'మహీను గుర్తుచేశాడు', 'సుందర్ మాత్రమే కాదు.. ఆస్ట్రేలియన్లు కూడా చూడలేదు', 'ఆండ్రీ ఫ్లెచర్ గుర్తొచ్చాడు' అంటూ కామెంట్ల వర్షం కురిపిస్తున్నారు.

110 ఏళ్ల రికార్డు బ‌ద్ధ‌లు

ఆడిన తొలి టెస్ట్‌లోనే బ్యాట్‌తో ఆస్ట్రేలియాకు చుక్క‌లు చూపించిన వాషింగ్ట‌న్ సుంద‌ర్ ఏకంగా 110 ఏళ్ల రికార్డును బ‌ద్ధ‌లు కొట్టాడు. సుందర్ చేసిన 62 ప‌రుగులు ఆస్ట్రేలియా గ‌డ్డ‌పై ఓ స‌రికొత్త రికార్డు సృష్టించింది. ఆస్ట్రేలియాలో ఆడిన తొలి టెస్ట్‌లోనే ఏడో నంబ‌ర్‌లో బ్యాటింగ్‌కు దిగి అత్య‌ధిక ప‌రుగులు చేసిన బ్యాట్స్‌మ‌న్‌గా నిలిచాడు. 1911లో ఇంగ్లండ్ త‌ర‌ఫున అరంగేట్రం చేసిన ఫ్రాంక్ పోస్ట‌ర్ 56 ప‌రుగుల రికార్డును సుంద‌ర్ అధిగ‌మించాడు.

మూడో ఇండియ‌న్‌గా

భార‌త్ తర‌ఫున అరంగేట్ర టెస్ట్‌లో ఏడో నంబ‌ర్ బ్యాట్స్‌మ‌న్ చేసిన మూడో అత్య‌ధిక స్కోర్ కూడా వాషింగ్ట‌న్ సుంద‌ర్ చేసినవే. ఈ లిస్ట్‌లో రాహుల్ ద్ర‌విడ్ ముందున్నాడు. అత‌ను 1996లో ఇంగ్లండ్‌పై తొలి టెస్ట్‌లో ఏడో నంబ‌ర్‌లో దిగి 96 ప‌రుగులు చేశాడు. ఇక తొలి టెస్ట్‌లోనే మూడు వికెట్ల‌తో పాటు హాఫ్ సెంచ‌రీ చేసిన మూడో ఇండియ‌న్‌గా సుంద‌ర్ నిలిచాడు. అత‌ని కంటే ముందు ద‌త్తు ఫాడ్క‌ర్‌, హ‌నుమ విహారి ఈ ఘ‌న‌త సాధించారు.