మైదానంలో ఆడాలంటే ఫిట్‌నెస్‌ చాలా ముఖ్యం.. నా ఫిట్‌నెస్‌కు ఫుట్‌బాలర్లే ప్రేరణ

ఫుట్‌బాల్‌ ఆటగాళ్లు ఎంతో ప్రొఫెషనల్‌:

గతంలో కోహ్లీ తన ఆహారం, శిక్షణకు సంబందించిన విషయాలను తెలిపాడు. ప్రస్తుతం క్రికెటర్లపై ఫుట్‌బాల్ క్రీడాకారుల ప్రభావాన్ని వెల్లడించాడు. తాజాగా విరాట్ కోహ్లీ మాట్లాడుతూ... 'మేం ఎప్పుడూ ఫుట్‌బాలర్ల క్రమశిక్షణను గమనిస్తుంటాం. ఇది మాకు అవసరం. మైదానంలోకి వెళ్లి ఆడాలంటే ఫిట్‌నెస్‌ చాలా ముఖ్యం. ఫిట్‌నెస్‌, పోషకాహారం, విశ్రాంతి తదితర అంశాల్లో ఫుట్‌బాల్‌ ఆటగాళ్లు ఎంతో ప్రొఫెషనల్‌గా ఉంటారు. మేం వారిని చూసి నేర్చుకుంటాం' అని తెలిపాడు.

క్రికెట్‌, ఫుట్‌బాల్‌ను పోల్చలేం:

'క్రికెట్‌, ఫుట్‌బాల్‌ను అస్సలు పోల్చలేం. అయితే ఫాస్ట్ బౌలర్ల శ్రమను మాత్రం పోల్చొచ్చు అని నా అభిప్రాయం. క్రికెట్‌కు అద్భుతమైన శారీరక దృఢత్వం అవసరం లేదు. ఫుట్‌బాల్‌ 90 నిమిషాలే ఆడతారు. పరిస్థితులను నియంత్రించేందుకు సమయం ఉండదు కాబట్టి వారికి శారీరక దృఢత్వం ఉండాలి. అయితే.. పుట్‌బాలర్ల స్థాయిలో దృఢంగా ఉండేందుకు క్రికెటర్లు ప్రయత్నించాలి. అప్పుడే క్రికెట్లో రాణించగలం. క్రికెటర్ల కన్నా ఫుట్‌బాలర్లు ఎక్కువ ఫిట్‌నెస్‌తో ఉంటారు' అని కోహ్లీ చెప్పుకొచ్చాడు.

సూపర్ క్యాచ్:

ఈ ఫిట్‌నెస్‌తోనే విరాట్ కోహ్లీ అద్భుతాలు చేస్తున్నాడు. అటు బ్యాటింగ్‌లో పరుగుల వరద పారిస్తూ.. మరోవైపు ఫీల్డింగ్‌లో కూడా కళ్లుచెదిరే క్యాచ్‌లతో ఔరా అనిపిస్తున్నాడు. సౌతాఫ్రికాతో జరిగిన రెండో టీ20లో కోహ్లీ సూపర్ క్యాచ్ పట్టాడు. ఇన్నింగ్స్‌ 12వ ఓవర్లో పేసర్ నవదీప్ సైనీ వేసిన ఆఫ్‌ కట్టర్‌ను డికాక్‌ భారీ షాట్ ఆడాడు. బంతి కాస్తా గాల్లోకి లేవడంతో మిడాఫ్‌లో ఫీల్డింగ్‌ చేస్తున్న కోహ్లీ చిరుతలా పరిగెత్తుకుంటూ వచ్చి డైవ్‌ చేసి ఒంటి చేత్తో క్యాచ్‌ అందుకున్నాడు. దీంతో టీమిండియా ఆటగాళ్లతో సహా అభిమానులు ఆనందంతో కేరింతలు కొట్టారు. మరోవైపు షాక్ తిన్న డికాక్‌ నిరాశగా పెవిలియన్ చేరాడు.