సచిన్‌ vs లారా.. ఆల్‌టైమ్ గ్రేట్ బ్యాట్స్‌మెన్ ఎవరో చెప్పిన వార్న్‌!!

సచిన్‌నే ఎంచుకుంటా:

సోమవారం షేన్‌ వార్న్‌ ఇన్‌స్టాగ్రామ్‌ లైవ్‌లో అభిమానులతో ముచ్చటించాడు. ఈ సందర్భంగా స‌చిన్‌, లారాల గురించి ఆస‌క్తిక‌ర వ్యాఖ్యాలు చేశాడు. అతడు ఆడిన సమయంలో అత్యుత్తమ బ్యాట్స్‌మన్‌ గురించి మాట్లాడాడు. 'ఎలాంటి పరిస్థితుల్లోనైనా సత్తాచాటే బ్యాట్స్‌మన్‌ను ఎంచుకోవాలంటే.. సచిన్, లారాలో ఎవరిని ఎంపిక చేయాలని కాస్త తడబడతా. అయితే నేను సచిన్‌నే ఎంచుకుంటా. అదే టెస్టు ఆఖరి రోజు 400 పరుగులు చేయాల్సి వస్తే లారాను తీసుకుంటా. ఇద్దరూ అద్భుతమైన ఆటగాళ్లు' అని వార్న్‌ అన్నాడు.

400 ప‌రుగుల రికార్డు లారాపైనే:

టెస్టు క్రికెట్ చ‌రిత్ర‌లో 400 ప‌రుగుల వ్య‌క్తిగ‌త స్కోరు చేసిన ఏకైక క్రికెట‌ర్‌గా లారాపైనే రికార్డు ఉంది. 16 ఏళ్ల కింద‌ట లారా నెల‌కొల్పిన ఈ రికార్డు, ఇప్ప‌టికీ చెక్కు చెద‌ర‌లేదు. మ‌రోవైపు అంత‌ర్జాతీయ క్రికెట్‌లో అనేక రికార్డులు స‌చిన్ పేరిటే ఉన్నాయి. టెస్టుల్లో 51 సెంచ‌రీలు, వన్డేల్లో 49 శ‌త‌కాలు సచిన్ నెలకొల్పాడు. 200 టెస్టులు, 461 వ‌న్డేలు, ఈ రెండు ఫార్మాట్ల‌లో అత్య‌ధిక ప‌రుగులు ఇలా అనేక రికార్డులు స‌చిన్ సొంతం. ఇక వార్న్‌ టెస్టుల్లో 708, వన్డేల్లో 293 వికెట్లు తీశాడు.

స్టీవ్‌ మ్యాచ్‌ విజేత:

ఆసీస్ మాజీ సారథి స్టీవ్‌ వా గురించి కూడా వార్న్‌ మాట్లాడాడు. స్టీవ్‌ను మ్యాచ్‌ విజేత అని అనడం కంటే మ్యాచ్‌ను కాపాడేవాడిగా పేర్కొనాలని అభిప్రాయపడ్డాడు. అయితే అతడు అలెన్‌ బోర్డర్‌ కెప్టెన్‌గా ఎంపిక చేసిన ఆస్ట్రేలియన్‌ టెస్టు XI జట్టులో ఓపెనర్ డేవిడ్ వార్నర్‌ లేకపోవడానికి కారణం తెలిపాడు. అతడు కలిసి ఆడిన ఆటగాళ్లను మాత్రమే ఎంచుకున్నానని, అందుకే వార్నర్‌ను ఎంపిక చేయలేదని తెలిపాడు. ఆసీస్‌ గొప్ప ఓపెనర్లలో వార్నర్‌ ఒకరని కొనియాడాడు.