భారత్‌లో భారత్‌ను ఓడించడం ఎంతో కఠినం: మూడు వన్డేల సిరిస్‌పై లబుషేన్

భారత్‌లో సిరీస్‌ అంటేనే ఓ సవాలే

"భారత్‌లో సిరీస్‌ అంటేనే ఓ సవాలే. ఎందుకంటే వారు బలమైన ప్రత్యర్థులు. టీమిండియాలో గొప్ప బ్యాట్స్‌మెన్, బౌలర్లు ఉన్నారు. జనవరిలో జరగనున్న వన్డే సిరీస్ ఎంతో ఆసక్తికరంగా ఉంటుంది. ఒక ప్లేయర్‌గా నీ ఆట ఏ స్థాయి ఉందో తెలుసుకోవాలంటే కఠిన పరిస్థితుల్లో బలమైన ప్రత్యర్థితో ఆడాలి. భారత్‌లో భారత్‌‌ను మించిన మరో కఠినమైన ప్రత్యర్ధి ఎవరూ ఉండరు" అని అన్నాడు.

14 టెస్టులు మాత్రమే ఆడిన లబుషేన్

ఇప్పటివరకు కేవలం 14 టెస్టులు మాత్రమే ఆడిన లబుషేన్ ఐసీసీ ఇటీవల ప్రకటించిన టెస్టు ర్యాంకింగ్స్‌లో మూడో స్థానంలో కొనసాగుతున్నాడు. దీంతో అతడిని మోడ్రన్ డే క్రికెట్ దిగ్గజాలైన విరాట్ కోహ్లీ, స్టీవ్ స్మిత్, కేన్ విలియమ్సన్‌లతో పోలుస్తున్నారు. దీనిపై లబుషేన్ సైతం స్పందించాడు.

కోహ్లీ, స్మిత్‌లతో పోలికపై

"అందరూ గొప్పగా ఆడుతున్నానని విరాట్‌ కోహ్లీ, కేన్ విలియమ్సనన్‌, స్టీవ్‌ స్మిత్‌తో పోలుస్తున్నారు. వారు 6-7 ఏళ్ల నుంచి ఎంతో నిలకడగా ఆడుతున్నారు. నేను ఈ వేసవిలో మాత్రమే ఆడాను. దీనికే గొప్ప బ్యాట్స్‌మన్‌గా మారిపోను. ప్రస్తుతం నా దృష్టంతా నిలకడగా రాణిస్తూ జట్టుకు విజయాలు అందించడమే" అని అన్నాడు.

అవకాశం వస్తే చాలా బాగుంటుంది

"నాకు అవకాశం వస్తే చాలా బాగుంటుంది. అదృష్టవశాత్తూ ఎంతో అనుభవం ఉన్న ఆరోన్ ఫించ్‌, డేవిడ్ వార్నర్, స్టీవ్ స్మిత్‌ నుంచి నేర్చుకుంటున్నాను. వాళ్లకు ఐపీఎల్‌, భారత పర్యటనల అనుభవం ఉంది. ఎస్‌సీజీ నుంచి నేరుగా భారత పర్యటనకు వెళ్లడం ఓ మంచి సన్నాహాకమే. స్పిన్నింగ్ పరిస్థితులకు ఇది ఆస్ట్రేలియాలో మనకు దగ్గరగా ఉంటుంది. కానీ ఫార్మాట్ మార్పుతో వికెట్లు భిన్నంగా ఉంటాయి" అని అన్నాడు. ఆస్ట్రేలియా తరుఫున ఇప్పటివరకు 14 టెస్టులు ఆడిన లబుషేన్ 63.43 యావరేజితో 1,459 పరుగులు చేశారు.