అప్పుడు వేలంలో అన్‌సోల్డ్‌ ప్లేయర్.. ఇప్పుడు రాజస్తాన్ స్పిన్ కన్సల్టెంట్‌గా బాధ్యతలు!!

స్పిన్ కన్సల్టెంట్‌గా సోధీ:

గత డిసెంబర్ నెలలో జరిగిన వేలం సందర్భంగా సోధీని రాజస్థాన్ రాయల్స్ విడుదల చేసి అందరినీ ఆశ్చర్యపర్చింది. ఆ వేలంలో అన్‌సోల్డ్‌గా మిగిలిపోయాడు. ఈ లెగ్‌ స్పిన్నర్‌ని తీసుకోవడానికి ఏ ప్రాంచైజీ ముందుకురాలేదు. అయితే సోధీని టీమ్ మేనేజ్‌మెంట్‌లోకి తీసుకుంటునట్లు తాజాగా రాజస్థాన్ నిర్ణయించింది. గత రెండు సీజన్లలో సోధీ రాజస్థాన్ తరపునే ప్రాతినిధ్యం వహించాడు.

కీలక బాధ్యతలు:

సోధీ మార్గదర్శకంలో రాజస్థాన్ జట్టులోని స్పిన్నర్లు అద్భుతంగా రాణించారు. ముఖ్యంగా శ్రేయస్ గోపాల్ గతేడాది హ్యాట్రిక్ తీసి సంచలనం సృష్టించాడు. ఇవన్ని పరిశీలించిన రాజస్థాన్ యాజమాన్యం అతనికి కీలక బాధ్యతలు అప్పజెప్పింది. స్పిన్ కన్సల్టెంట్‌గా స్పిన్ కోచ్ సాయిరాజ్ బహుతులేతో సోధీ కలిసి పనిచేయనున్నాడు. అలాగే చీఫ్ ఆపరేషన్ ఆఫీసర్ జేక్ లాష్‌ మెక్రమ్‌తో కలిసి ఆపరేషన్ ఎగ్గిక్యుటివ్‌గా బాధ్యతలు నిర్వర్తిస్తాడు.

స్మిత్ బాధ్యతలు:

సోధీ సహాయాక కోచ్ రూపంలో జట్టులోకి రావడాన్ని గోపాల్ స్వాగతించాడు. గతంలో అతనితో ఆడిన విషయాన్ని గుర్తు తెచ్చుకుని ఆనందం వ్యక్తం చేశాడు. 2008లో ఐపీఎల్ చాంపియన్‌గా నిలిచిన రాజస్థాన్.. మళ్లీ ఒక్కసారి కూడా ఫైనల్ చేరుకోలేకపోయింది. గతేడాది లీగ్ దశకే పరిమితమైంది. సారధిగా అజింక్య రహానే విఫలమవడంతో అతని స్థానంలో స్టీవ్ స్మిత్ బాధ్యతలు చేపట్టాడు.

ఫ్రాంచైజీని ప్రేమిస్తున్నా:

తాజా నియామంకపై సోధీ సానుకూలంగా స్పందించాడు. 'కొత్త పాత్రలో రాయల్స్ కుటుంబానికి తిరిగి వచ్చినందుకు చాలా సంతోషంగా ఉన్నా. రాయల్స్‌తో కలిసి పనిచేసే అవకాశాన్ని సద్వినియోగం చేసుకుంటా. రెండు బాధ్యతలను సక్రమంగా నిర్వర్తిస్తా. గత రెండు సీజన్లలో ఆటగాళ్లతో ఉన్నా కాబట్టి వారిపై మంచి అవగాహన ఉంది. వారినుంచి చాలా మద్దతు లభించింది. నేను ఈ ఫ్రాంచైజీని ప్రేమిస్తున్నా. ఈ సంవత్సరం టైటిల్ గెలవడానికి నా వంతు సహాయం చేస్తా' అని సోధీ చెప్పుకొచ్చాడు.