వంద శాతం ఇవ్వడానికి ట్రై చేశా..
ఇదే విషయంపై కేఎల్ రాహుల్ తాజాగా స్పందించాడు. బంగ్లాతో జరిగిన రెండు టెస్టుల్లో అతను వరుసగా 22, 23, 10, 2 పరుగులు మాత్రమే చేశాడు. ఒక్కసారి కూడా కనీసం 25 పరుగుల స్కోరు దాటలేకపోయాడు. దీని గురించి మాట్లాడిన రాహుల్.. 'ఇంతకు ముందు ఏం చేసి ఉంటే బాగుండేది? అని ఆలోచిస్తూ బరిలో దిగం. అలాగే ఆ తర్వాత ఏం జరుగుతుందని కూడా టెన్షన్ పడటం జరగదు. ఆ క్షణంలో మైదానంలో నూటికి నూరు శాతం ఇవ్వడానికి ప్రయత్నిస్తాం. కొన్నిసార్లు అది అనుకున్నట్లు జరగదు అంతే' అని వివరించాడు.
భవిష్యత్తుకు ఇవి పాఠాలు..
తన కెరీర్లో ఎన్నో ఎత్తు పల్లాలు చూశానని రాహుల్ చెప్పాడు. అయితే ఏదీ కూడా ఎక్కువ కాలం కొనసాగదని తనకు తెలుసన్నాడు. 'మూడు ఫార్మాట్లలో ఆడుతున్నప్పుడు ఒక దాని నుంచి మరొక ఫార్మాట్కు చటుక్కున మారడం కష్టం. వ్యక్తిగతంగా నేను చాలా రోజులుగా టెస్టు క్రికెట్ ఆడలేదు. కాబట్టి మళ్లీ ఆ మైండ్ సెట్లోకి వెళ్లడానికి కొంత టైం పడుతుంది' అని చెప్పాడు. అలాగే బంగ్లాదేశ్ పర్యటనలో తన ప్రదర్శన ఏమాత్రం బాగలేదని ఒప్పుకున్నాడు. అయితే దీని నుంచి నేర్చుకున్న పాఠాలు భవిష్యత్తుకు ఉపయోగపడతాయని అభిప్రాయపడ్డాడు.
ప్రయత్నం చేసినా ఫలితం లేదు..
'బంగ్లా పర్యటనలో కొన్ని ప్రదర్శనలు బాగలేవు. దాన్ని నేను ఒప్పుకుంటున్నాను. నేను నా ప్రయత్నం చేశాను కానీ ఫలితం లేకుండా పోయింది. అయితే ఇక ముందు నేను ఏం చేయగలనో? నాలో ఏ విషయాన్ని మెరుగు పరుచుకోగలనో ఆలోచిస్తాను. ప్రిపేర్ అవడం, మరింత కష్టపడటం మాత్రమే కదా మన చేతుల్లో ఉండేది. కానీ ఏం చేసినా మనం పూర్తిగా పర్ఫెక్ట్ అవ్వలేం. వచ్చే నెల రోజులు మొత్తం స్పిన్ బౌలింగ్ ఎదుర్కోవడం ప్రాక్టీస్ చేసినా ఆ తర్వాతి మ్యాచుల్లో సెంచరీలు చేస్తామని గ్యారంటీ ఉండదు కదా. సరైన మైండ్ సెట్తో ప్రిపేర్ అవడం మాత్రమే మన చేతుల్లో ఉంటుంది. ఆస్ట్రేలియా నాలుగు కీలకమైన టెస్టులు ఆడనున్నాం. అప్పుడు పిచ్లు స్పిన్కు సహకరిస్తాయి. ఆస్ట్రేలియా కూడా దానికి గట్టిగా ప్రిపేర్ అయి వస్తుంది' అని పేర్కొన్నాడు.