తొలి టెస్ట్‌లో విజయం: పంత్ రికార్డుని మరచిన బీసీసీఐ

తొలి టెస్టులో రిషబ్‌ పంత్‌ అరుదైన రికార్డు

అడిలైడ్ ఓవల్ వేదికగా జరిగిన తొలి టెస్టులో రిషబ్‌ పంత్‌ అరుదైన రికార్డు సాధించాడు. తొలి ఇన్నింగ్స్‌లో 6 క్యాచ్‌లు, రెండో ఇన్నింగ్స్‌లో 5 క్యాచ్‌లు పట్టి తనకు తాను మాత్రమే సాటి అనిపించుకున్నాడు. దీంతో ఓ టెస్ట్ మ్యాచ్‌లో అత్యధిక క్యాచ్‌లు భారత వికెట్ కీపర్‌గా రిషబ్ చరిత్ర సృష్టించాడు.

తొలి టెస్టులో 11 క్యాచ్‌లు పట్టిన పంత్

ఈ మ్యాచ్‌లో మొత్తం 11 క్యాచ్‌లు పట్టిన రిషబ్ పంత్‌.. ఒక టెస్టులో అత్యధిక క్యాచ్‌లు అందుకున్న జాక్‌ రసెల్‌ (ఇంగ్లాండ్‌, దక్షిణాఫ్రికాపై, 1995లో), ఏబీ డివిలియర్స్‌ (దక్షిణాఫ్రికా, పాకిస్థాన్‌పై, 2013లో) ప్రపంచ రికార్డును సమం చేశాడు. అడిలైడ్ టెస్టులో ఉస్మాన్ ఖవాజా, పీటర్ హ్యాండ్స్‌కూంబ్, ట్రావిస్ హెడ్, టిమ్ పెయిన్, మిషెల్ స్టార్క్, జోష్ హేజిల్‌వుడ్ ఇచ్చిన క్యాచ్‌లు అందుకున్నాడు.

రిషబ్ పంత్‌కు ఇది ఆరో టెస్టు మాత్రమే

రెండో ఇన్నింగ్స్‌లో ఆరోన్ ఫించ్, మార్కస్ హారిస్, షాన్ మార్ష్, టిమ్ పెయిన్, మిషెల్ స్టార్క్‌ ఇచ్చిన క్యాచ్‌లు పట్టి వరల్డ్ రికార్డ్ సమం చేశాడు. భారత్‌ తరఫున ఒక టెస్టులో అత్యధిక క్యాచ్‌లు అందుకున్న వృద్ధిమాన్‌ సాహా (10) రికార్డును కూడా బద్దలు కొట్టాడు. వృద్ధిమాన్ సాహా గాయపడడంతో అతని స్థానంలో జట్టులోకి వచ్చిన రిషబ్ పంత్‌కు ఇది ఆరో టెస్టు మాత్రం కావడం విశేషం.

ఓ టెస్ట్‌లో అత్యధిక క్యాచ్‌లు పట్టిన వికెట్ కీపర్లు:

* 11 - దక్షిణాఫ్రికాపై ఇంగ్లండ్ వికెట్ కీపర్ జాక్ రస్సెల్ - జోహన్నెస్బర్గ్, 1995

* 11 - పాకిస్థాన్‌పై సౌతాఫ్రికా వికెట్ కీపర్ ఏబీ డివిలియర్స్ - జోహన్స్బర్గ్, 2013

* 11 - ఆస్ట్రేలియాపై భారత వికెట్ కీపర్ రిషబ్ పంత్ - అడిలైడ్, 2018

అత్యధిక క్యాచ్‌లు పట్టిన భారత వికెట్ కీపర్లు

ఇక, భారత విషయానికి వస్తే టీమిండియా మాజీ కెప్టెన్ మహేంద్ర ధోని, వృద్ధిమాన్ సాహా మాత్రమే ఓ టెస్ట్ మ్యాచ్‌లోని రెండు ఇన్నింగ్స్‌ల్లో 9 అంతకంటే ఎక్కువ క్యాచ్‌లు పట్టారు. ధోని 9 క్యాచ్‌లు పట్టగా, సాహా 10 క్యాచ్‌లు అందుకున్నారు.

ఓ టెస్ట్‌లో అత్యధిక క్యాచ్‌లు పట్టిన భారత వికెట్ కీపర్లు:

* 11 - ఆస్ట్రేలియాపై రిషబ్ పంత్ , అడిలైడ్, 2018

* 10 - సౌతాఫ్రికాపై వృద్ధిమాన్ సాహా , కేప్ టౌన్, 2018

* 9 - ఆస్ట్రేలియాపై ధోనీ ,మెల్‌బోర్న్, 2014