1000వ టెస్టు: ఇంగ్లాండ్‌కు ఐసీసీ కంగ్రాట్స్, మొత్తం గణాంకాలివే

ఇంగ్లాండ్ జట్టుకు తొలి కెప్టెన్‌గా జేమ్స్‌ లిల్లీవైట్‌

ఈ టెస్టు మ్యాచ్ ఆరంభానికి ముందు ఐసీసీ మ్యాచ్ రిఫరీ ప్యానెల్‌లో సభ్యుడు, మాజీ న్యూజిలాండ్ కెప్టెన్ జెఫ్ క్రౌన్‌కు ఐసీసీ తరుపున ఇంగ్లాండ్ అండ్ వేల్స్ క్రికెట్ బోర్డు ఛైర్మన్ కోలిన్ గ్రేవ్స్ వెండి ఫలకాన్ని బహుకరించనున్నారు. ఇంగ్లాండ్‌ జట్టు 1877లో తన తొలి టెస్టును ఆస్ట్రేలియాతో ఆడింది. మెల్‌బోర్న్‌ వేదికగా జరిగిన ఈ టెస్టులో జేమ్స్‌ లిల్లీవైట్‌ సారథ్యం వహించాడు.

ఇప్పటివరకు 999 టెస్టులాడిన ఇంగ్లాండ్

మొత్తం 999 టెస్టుల్లో ఇంగ్లాండ్ జట్టు 357 మ్యాచ్‌లలో విజయం సాధించగా... 297 మ్యాచ్‌ల్లో ఓటమి పాలైంది. 345 మ్యాచ్‌లు డ్రా అయ్యాయి. ఇప్పటి వరకు 999 టెస్టులాడిన ఇంగ్లాండ్ అత్యధిక టెస్ట్ మ్యాచ్‌లాడిన జాబితాలో అగ్రస్థానంలో ఉంది. కాగా, భారత్-ఇంగ్లాండ్ జట్ల మధ్య తొలి టెస్టు జూన్, 1932లో జరిగింది.

ఎడ్జిబాస్టన్‌లో 50 టెస్టులు

ఇప్పటివరకు ఇరు జట్ల మధ్య మొత్తం 117 టెస్టు మ్యాచ్‌లు జరగ్గా... ఇంగ్లాండ్ 43 టెస్టుల్లో విజయం సాధించగా, 25 టెస్టుల్లో ఓటమి పాలైంది. ప్రస్తుతం భారత్-ఇంగ్లాండ్ జట్ల మధ్య జరిగే తొలి టెస్టుకు ఆతిథ్యమిస్తోన్న ఎడ్జిబాస్టన్‌లో ఇప్పటివరకు 50 టెస్టు మ్యాచ్‌లు జరిగాయి. 1902లో ఆస్ట్రేలియా-ఇంగ్లాండ్ జట్ల మధ్య ఇక్కడ తొలి టెస్టు మ్యాచ్ జరిగింది.

ఎడ్జిబాస్టన్‌లో ఇంగ్లాండ్ మెరుగైన రికార్డు

ఈ స్టేడియంలో ఇంగ్లాండ్ 27 టెస్టుల్లో విజయం సాధించగా, 8 టెస్టుల్లో ఓటమి, 15 టెస్టులు డ్రాగా ముగిశాయి. ఇక, భారత్-ఇంగ్లాండ్ జట్ల మధ్య ఎడ్జిబాస్టన్ వేదికగా మొత్తం 6 టెస్టు జరిగాయి. భారత్‌పై 5-0తో ఇంగ్లాండ్ మెరుగైన రికార్డుని కలిగి ఉంది.