'అతనిలో ఉన్న ఆత్మవిశ్వాసం ఏ కెప్టెన్‌లోనూ చూడలేదు'

ఓటమిని ఒప్పుకోడు:

వివ్‌ రిచర్డ్స్‌ మాట్లాడుతూ... 'కోహ్లీలో ఉన్న ఆత్మవిశ్వాసం ఏ కెప్టెన్‌లోనూ చూడలేదు. ఆత్మవిశ్వాసం ఒక రాత్రిలో వచ్చేది కాదు. ఎంతో శ్రమించి బాగా ఆడితేనో లేదా పుట్టుకతో రావాలి. కోహ్లీ ఓ పోరాట యోధుడు. ఎటువంటి పరిస్థితుల్లో కూడా ఓటమిని ఒప్పుకోడు. జట్టుని గెలిపించడానికే ప్రయత్నిస్తాడు. అది సరైన పద్ధతి' అని రిచర్డ్స్‌ పేర్కొన్నాడు.

దూకుడు లేకపోతే.. ఎలా:

'కోహ్లీ లాంటి కెప్టెన్‌ అంటే ఇష్టం. అతడి దూకుడే విజయాలను అందిస్తుంది. కెప్టెన్‌కు దూకుడు లేకపోతే.. మ్యాచ్‌ గెలవడం కష్టం. కెప్టెన్సీలో ఒక్కొక్కరిదీ ఒక్కో శైలి ఉంటుంది. అలా కోహ్లీ కూడా ఓ ప్రత్యేక శైలిని అనుసరిస్తాడు. ప్రతీ ఆటగాడు ప్రపంచకప్‌లో ఆడాలనుకుంటాడు. తమ జట్టు విజేతగా నిలవాలని కోరుకుంటాడు. అదే కోహ్లీలో కూడా ఉంది' అని రిచర్డ్స్‌ తెలిపారు.

పాకిస్థాన్‌లోనూ అభిమానులు:

పాక్ మాజీ క్రికెటర్‌ యూనిస్‌ ఖాన్‌ మాట్లాడుతూ... 'ఇండియా బౌలింగ్ పాకిస్థాన్ కంటే బలంగా ఉంది. ప్రపంచకప్‌ టోర్నీలో టీమిండియాకు కోహ్లీయే కీలకం. పాకిస్థాన్‌లోని చాలా మంది యువ ఆటగాళ్లు కోహ్లీలా ఆడాలనుకుంటున్నారు. కోహ్లీకి ప్రపంచ వ్యాప్తంగా అభిమానులు ఉన్నారు. పాకిస్థాన్‌లోనూ ఉన్నారు. ఆసియా కప్‌లో అతడు ఆడకున్నా.. మైదానాలు నిండిపోయాయి' అని యూనిస్‌ ఖాన్‌ గుర్తు చేశారు.