తస్మాత్ జాగ్రత్త! సెమీస్‌లో గెలవాలంటే అది మారాల్సిందే!: మాజీ క్రికెటర్

T20 World Cup 2026: టీ20 ప్రపంచకప్ 2026 తుది దశకు చేరుకుంది. సెమీ ఫైనల్‌లో పటిష్టమైన ఇంగ్లండ్ జట్టుతో తలపడనున్న తరుణంలో టీమిండియా మాజీ ఆల్‌రౌండర్ ఇర్ఫాన్ పఠాన్ భారత జట్టును అప్రమత్తం చేశారు. టోర్నీ పొడుగునా భారత్ అద్భుతంగా ఆడినప్పటికీ.. సెమీస్ వంటి నాకౌట్ మ్యాచ్‌ల్లో చిన్న పొరపాట్లు కూడా భారీ మూల్యాన్ని చెల్లించాల్సి ఉంటుందని ఆయన అభిప్రాయపడ్డారు. ముఖ్యంగా యువ ఓపెనర్ అభిషేక్ శర్మ టెక్నిక్, కీలక ఆటగాడు సూర్యకుమార్ యాదవ్ బ్యాటింగ్ సరళిపై ఇర్ఫాన్ పఠాన్ లోతైన విశ్లేషణ చేశారు.

అభిషేక్ శర్మ టెక్నిక్‌లో లోపాలు
వెస్టిండీస్‌తో జరిగిన సూపర్-8 మ్యాచ్‌లో అభిషేక్ శర్మ కేవలం 10 పరుగులకే వెనుదిరగడం పట్ల ఇర్ఫాన్ పఠాన్ ఆందోళన వ్యక్తం చేశారు. అభిషేక్ శర్మ బ్యాటింగ్ స్టైల్లో ఓ కీలక లోపాన్ని గమనించినట్లు ఆయన వెల్లడించారు. షాట్ ఆడే సమయంలో అభిషేక్ శర్మ తన వెనుక మోకాలిని ఎక్కువగా వంచుతున్నాడని.. దీనివల్ల అతని శరీర సమతుల్యత దెబ్బతిని వెనక్కి పడిపోతున్నాడని ఇర్ఫాన్ పఠాన్ వివరించారు. నాణ్యమైన బౌలింగ్‌ను ఎదుర్కోవాలంటే బ్యాటర్ బరువు ముందు కాలిపై ఉండాలని.. అప్పుడే షాట్‌లో పవర్, కంట్రోల్ ఉంటుందని ఆయన సూచించారు. జింబాబ్వేపై హాఫ్ సెంచరీ చేసిన తర్వాత అభిషేక్ ఫామ్ కాస్త తగ్గడం సెమీస్‌కు ముందు ఆలోచించాల్సిన విషయమేనని పేర్కొన్నారు.

సూర్యకుమార్ యాదవ్‌పై అంచనాలు
ప్రస్తుతం టీమిండియా తరపున ఈ టోర్నీలో 231 పరుగులతో టాప్ స్కోరర్‌గా ఉన్న సూర్యకుమార్ యాదవ్‌కు కూడా ఇర్ఫాన్ పఠాన్ ఓ కీలక సలహా ఇచ్చారు. సూర్య ఆరంభంలో అద్భుతమైన షాట్లు ఆడుతున్నప్పటికీ.. వాటిని భారీ స్కోర్లుగా మార్చడంలో ఈ మధ్య విఫలమవుతున్నాడని పఠాన్ గుర్తు చేశారు. అమెరికాపై 84 పరుగుల వీరోచిత ఇన్నింగ్స్ తర్వాత సూర్య మళ్లీ ఆ స్థాయిలో మెరవలేదు. ఇంగ్లండ్ వంటి మేటి జట్లతో ఆడేటప్పుడు సూర్య క్రీజులో ఎక్కువ సమయం గడపడం జట్టుకు ఎంతో అవసరమని.. అతను కేవలం మెరుపులు మెరిపించడమే కాకుండా ఇన్నింగ్స్‌ను ఆఖరి వరకు నడిపించాలని పఠాన్ కోరారు.

వెస్టిండీస్‌పై ఉత్కంఠ విజయం.. సెమీస్‌కు మార్గం
వెస్టిండీస్‌తో జరిగిన కీలక మ్యాచ్‌లో భారత్ విజయం సాధించిన తీరును పఠాన్ ప్రశంసించారు. వెస్టిండీస్ బ్యాటర్లు 195 పరుగుల భారీ లక్ష్యాన్ని నిర్దేశించినా.. భారత్ వెనక్కు తగ్గలేదు. ఆరంభంలో ఓపెనర్లు నిరాశపరిచినప్పటికీ, సంజూ శాంసన్ తన అసాధారణ పోరాటంతో (97 నాటౌట్) మ్యాచ్‌ను మలుపు తిప్పాడు. అతనికి తిలక్ వర్మ, హార్దిక్ పాండ్యా అండగా నిలిచారు. ఈ విజయం జట్టులో ఆత్మవిశ్వాసాన్ని నింపినప్పటికీ.. సెమీస్‌లో ఇంగ్లండ్ బౌలింగ్‌ను ఎదుర్కోవాలంటే టాపార్డర్ నుంచి బలమైన పునాది అవసరమని ఇర్ఫాన్ పఠాన్ తేల్చి చెప్పాడు.

వాంఖడే పోరు.. అగ్నిపరీక్ష
ఈ గురువారం ముంబైలోని వాంఖడే స్టేడియంలో భారత్, ఇంగ్లండ్ జట్లు సెమీఫైనల్‌లో తలపడనున్నాయి. వాంఖడే పిచ్ సాధారణంగా బ్యాటింగ్‌కు అనుకూలిస్తుంది, కాబట్టి ఇక్కడ భారీ స్కోర్లు నమోదయ్యే అవకాశం ఉంది. ఇంగ్లండ్‌ను ఓడించాలంటే, పఠాన్ సూచించినట్లుగా అభిషేక్ శర్మ తన టెక్నిక్ సరిచేసుకోవడం, సూర్యకుమార్ తన ఫామ్‌ను నిలబెట్టుకోవడం చాలా కీలకం. సొంత గడ్డపై జరుగుతున్న ఈ పోరులో టీమిండియా ఫైనల్ చేరుతుందో లేదో వేచి చూడాలి.