క్రిస్ గేల్‌పై ప్రపంచవ్యాప్తంగా నిషేధించాలి: ఇయాన్ పైర్

సిడ్నీ: బిగ్ బాష్ లీగ్ మ్యాచ్ సందర్భంగా టీవీ జర్నలిస్ట్ మెల్ మెక్‌లాలిన్‌తో అసభ్యంగా మాట్లాడిన వెస్టిండీస్ క్రికెటర్ క్రిస్ గేల్ పైన ప్రపంచవ్యాప్తంగా నిషేధం విధించాలని ఆస్ట్రేలియా మాజీ క్రికెటర్ ఇయాన్ చాపెల్ డిమాండ్ చేశాడు. ఈ మేరకు ఓ ప్రతిపాదన చేయాలని క్రికెట్ ఆస్ట్రేలియాకు సూచించాడు.

క్రిస్ గేల్ ప్రవర్తన ఏమాత్రం బాగోలేదన్నాడు. ఈ విషయంలో సహనంతో ఉండాల్సిన అవసరం లేదన్నాడు. ఆస్ట్రేలియాలోని ఏ క్లబ్బూ అతనితో ఇక కాంట్రాక్టు కుదుర్చుకోకూడదని 'క్రికెట్ ఆస్ట్రేలియా' నిర్ణయిస్తే తమకు ఎలాంటి ఇబ్బంది లేదన్నాడు.

అలాగే ఐసీసీకి ఈ మేరకు లేఖ రాసినా ఫరవాలేదన్నాడు. లేకుంటే వేర్వేరుగా అన్ని దేశాలకు ఈ విషయం చెప్పాలన్నాడు. గేల్‌కు కేవలం రూ.6 లక్షల జరిమానాతో సరిపెట్టడం సరికాదన్నాడు.

తాను ఏ మహిళతో మాట్లాడినా ఒకేలాంటి సమాధానం వచ్చిందని, అందరూ అతనిపై నిషేధం విధించాలనే కోరారని చెప్పాడు. క్రిస్ గేల్ తరుచూ ఇలా చేస్తూనే ఉంటాడని, అందువల్ల అతడి పైన ప్రపంచవ్యాప్తంగా నిషేధం విధిస్తే అది యువ క్రికెటర్లకు గట్టి సందేశం ఇచ్చినట్లు అవుతుందన్నాడు.