శ్రీలంకతో తొలి టెస్టు: కపిల్ రికార్డుని అధిగమించిన డేల్ స్టెయిన్

4 వికెట్లు తీసిన డేల్ స్టెయిన్

డర్బన్ వేదికగా బుధవారం ప్రారంభమైన ఈ టెస్టులో శ్రీలంక తొలి ఇన్నింగ్స్‌లో 20 ఓవర్లు పాటు బౌలింగ్ వేసిన డేల్ స్టెయిన్ 4 వికెట్లు తీసి 48 పరుగులు సమర్పించుకున్నాడు. ఫలితంగా టెస్టు క్రికెట్‌లో 437వ వికెట్లను ఖాతాలో వేసుకున్నాడు. ఈ టెస్టు మ్యాచ్ ప్రారంభానికి ముందు డేల్ స్టెయిన్ టీమిండియా క్రికెట్ దిగ్గజం కపిల్‌దేవ్‌(434 వికెట్లు)కు రెండు వికెట్లు దూరంలో ఉన్నాడు.

స్టువర్ట్‌ బ్రాడ్‌తో కలిసి ఏడో స్థానంలో

అయితే ఈ మ్యాచ్‌లో నాలుగు వికెట్లు తీయడంతో ఇంగ్లాండ్ పేసర్‌ స్టువర్ట్‌ బ్రాడ్‌(437 వికెట్లు)తో కలిసి సంయుక్తంగా ఏడో స్థానాన్ని ఆక‍్రమించాడు. తన కెరీర్‌లో 92వ టెస్టు మ్యాచ్‌ ఆడుతున్న డేల్ స్టెయిన్‌ 26సార్లు ఐదు వికెట్లను సాధించాడు. కాగా, టెస్టు క్రికెట్‌లో అత్యధిక వికెట్లు సాధించిన వారిలో ముత్తయ్య మురళీ ధరన్‌(800వికెట్లు) అగ్రస్థానంలో ఉండగా, షేన్‌ వార్న్‌(708) రెండో స్థానంలో.... అనిల్‌ కుంబ్లే(619), జేమ్స్‌ అండర్సన్‌(575), మెక్‌గ్రాత్‌(563), వాల్ష్‌(516)లు ఆ తర్వాతి స్థానాల్లో కొనసాగుతున్నారు.

191 పరుగులకే శ్రీలంక ఆలౌట్

ఈ టెస్టులో టాస్ గెలిచిన శ్రీలంక ఆతిథ్య జట్టుని బ్యాటింగ్‌కు ఆహ్వానించగా దక్షిణాఫ్రికా తొలి ఇన్నింగ్స్‌లో 235 పరుగులు చేసి ఆలౌటైంది. అనంతరం తొలి ఇన్నింగ్స్‌ను ప్రారంభించిన శ్రీలంక 191 పరుగులకే కుప్పకూలింది. సఫారీ బౌలర్లలో డేల్ స్టెయిన్ నాలుగు వికెట్లు తీయగా ఫిలాండర్, రబడ చెరో రెండు వికెట్లు తీసుకున్నారు. ఓలివర్‌కు ఒక వికెట్ లభించింది.