ఇంగ్లీష్ దినపత్రికపై న్యాయపోరాటానికి దిగిన బెన్‌ స్టోక్స్‌!!

స్టోక్స్ సీక్రెట్ ట్రాజెడీ:

ఆంగ్ల వార్తా దినపత్రిక అయిన 'ది సన్' మొదటగా 'స్టోక్స్ సీక్రెట్ ట్రాజెడీ' అనే పేరుతో ఓ కథనాన్ని ప్రచురించింది. బెన్ స్టోక్స్ జన్మించడానికి మూడేళ్ల ముందు అతడి కుటుంబంలో జరిగిన ఓ విషాదకర సంఘటనను ప్రచురించింది. బెన్ స్టోక్స్‌ సోదరి, సోదరుడుని అతడి తల్లి మాజీ ప్రియుడు అతి కిరాతకంగా హత్య చేశాడు. ఈ వార్తను మూడు దశాబ్దాల తర్వాత హైలెట్‌ చేస్తూ.. ది సన్ పత్రిక ప్రచురించింది. స్టోక్స్ కుటుంబానికి సంబంధించిన ఈ సున్నితమైన అంశాన్ని ప్రచురించడంపై స్టోక్స్ ట్విట్టర్ వేదికగా తీవ్ర ఆగ్రహం వ్యక్తం చేశాడు. జర్నలిజం పేరుతో ఇంత దిగజారతారా? అని ప్రశ్నించారు.

భార్యతో గొడవ:

తాజాగా మరో పత్రిక ఓ కథనాన్ని కూడా ప్రచురించింది. ప్రొఫెషనల్‌ క్రికెటర్స్‌ అసోసియేషన్‌ (పీసీఏ) అవార్డుల కార్యక్రమం ముగిశాక.. స్టోక్స్‌ తన భార్యతో గొడవపెట్టుకున్నాడని ఓ ఇంగ్లీష్ మీడియాలో వార్తలు వచ్చాయి. అంతేకాకుండా స్టోక్స్‌ భార్య క్లారే అతడి చెంపపై కొట్టినట్టు ఫొటోతో సహా ప్రచురించింది. అయితే ఆ ఫోటోలో బెన్‌ స్టోక్స్‌ను క్లారే కొట్టనట్లు స్పష్టంగా కనిపిస్తోంది. కానీ.. ఆ మీడియా మాత్రం స్టోక్స్‌ను క్లారే కొట్టినట్లు ప్రచురించింది. ఈ విషయంపై స్టోక్స్‌ దంపతులు ఆగ్రహం వ్యక్తం చేశారు.

స్టోక్స్‌ అసహనం:

మీడియాలో వరుసగా తన గురించి కథనాలు రావడం పట్ల స్టోక్స్‌ అసహనం వ్యక్తం చేస్తున్నాడు. ఈ క్రమంలోనే స్టోక్స్‌ న్యాయపోరాటానికి దిగాడు. మరోఆవైపు స్టోక్స్‌కు ఇంగ్లండ్‌ క్రికెటర్లు మద్దతుగా నిలుస్తున్నారు. స్టోక్స్‌కు వ్యతిరేకంగా వార్తలు రాస్తున్న పత్రికలను వారందరూ విమర్శిస్తున్నారు. న్యాయపోరాటానికి దిగిన బెన్‌ స్టోక్స్‌కు న్యాయం దక్కుతుందో చూడాలి.

441 పరుగులు చేసిన బెన్ స్టోక్స్:

ఇటీవలే ముగిసిన ఐదు టెస్టుల యాషెస్ సిరిస్‌లో బెన్ స్టోక్స్ 55.12 యావరేజితో మొత్తం 441 పరుగులు చేశాడు. ఇందులో రెండు సెంచరీలు ఉన్నాయి. దీనికి తోడు 8 వికెట్లు కూడా పడగొట్టాడు. గత ఆదివారం ఓవల్ వేదికగా ముగిసిన ఐదో టెస్టులో ఇంగ్లాండ్ విజయం సాధించడంతో ఐదు టెస్టుల యాషెస్ సిరిస్ 2-2తో సమం అయింది. 47 ఏళ్ల తర్వాత యాషెస్‌ సిరీస్‌ డ్రా కావడం ఇదే తొలిసారి. సిరీస్‌ డ్రా అయినప్పటికీ, ట్రోఫీ మాత్రం ఆస్ట్రేలియా దగ్గరే ఉంటుంది. గత యాషెస్ సిరిస్‌లో ఆసీస్‌ గెలిచినందున ట్రోఫీని వారి వద్దే ఉండనుంది.