నా భర్తను కోర్టుకు లాగుతా
కానీ వైవాహిక బంధాన్ని తెంచుకునే ప్రసక్తే లేదని, భర్తను కోర్టుకు లాగుతానని ఆమె జాతీయ మీడియాకు తెలిపారు. అంతేకాదు తన భర్త సంబంధాలు కొనసాగిస్తున్న కొందరు యువుతులు, మహిళల వివరాలు, ఫోన్ నెంబర్లను ఆమె సోషల్ మీడియాలో సైతం పోస్టు చేయడం కలకలం రేపింది. అయితే షమీ దీనిపై వివరణ కూడా ఇచ్చాడు.
నా చేసిన ఆరోపణల్లో వాస్తవం లేదు
కెరీర్ పరంగా తనను దెబ్బతీసేందుకు కొందరు ఈ కుట్ర పన్నారని.. భార్య తనపై చేసిన ఆరోపణల్లో వాస్తవం లేదని క్రికెటర్ షమీ చెప్పడం విశేషం. తాజా పరిణామాల నేపథ్యంలోనే చివరి నిమిషంలో అతని పేరును జాబితా నుంచి తప్పించినట్లు బోర్డు వర్గాలు వెల్లడించాయి. తాజా వివాదంపై విచారణ పూర్తయ్యే వరకు షమీకి కాంట్రాక్ట్ దక్కదు.
షమీపై వచ్చిన ఆరోపణలను పరిగణనలోకి తీసుకున్న బోర్డు
'షమీ వ్యక్తిగత జీవితంపై వచ్చిన ఆరోపణలను, వార్తలను బోర్డు పరిగణనలోకి తీసుకుంది. దీంతో షమీ కాంట్రాక్ట్ను నిలిపే విషయంలో మేమే సందిగ్ధ స్థితిలో నిలిచాం. క్రికెటర్ల కాంట్రాక్టులు రూపొందించిన రోజే షమీ భార్య అతడిపై తీవ్ర ఆరోపణలు చేశారు. షమీ భార్య ఆరోపణలకు, షమీ కాంట్రాక్ట్ నిర్ణయానికి ఎలాంటి సంబంధం లేదు' అని బీసీసీఐ అధికారి తెలిపాడు
అందుకే షమీ పేరు కాంట్రాక్టులో లేదు
'షమిపై ఆరోపణలు చేసిన మహిళ.. పోలీసు కమిషనర్ను కలిసి ఫిర్యాదు చేసిన నేపథ్యంలో.. అధికారిక నివేదిక వచ్చే వరకు అతడి విషయంలో వేచిచూడడమే తెలివైన పని. మా నిర్ణయం తప్పుడు సంకేతాలు పంపే అవకాశం ఉండొచ్చునని కూడా చర్చించుకున్నాం. అందుకే అతడి పేరును కాంట్రాక్ట్ జాబితాలో ప్రకటించలేదు' అని ఆయన తెలిపారు.
సీఓఏ చీఫ్ వినోద్ రాయ్ మాట్లాడుతూ
మరోవైపు సీఓఏ చీఫ్ వినోద్ రాయ్ మాట్లాడుతూ 'షమీ కాంట్రాక్ట్ను నిలిపే విషయంలో మేమే సందిగ్ధ స్థితిలో నిలిచాం. అవి వ్యక్తిగత ఆరోపణలైతే కాంట్రాక్ట్ ప్రొఫెషనల్కు సంబంధించినది కదా అనే సందేహం వచ్చింది. అయితే ఆరోపణలు ఇంత తీవ్రంగా ఉన్నా మీరు అతడికి గుర్తింపు ఇస్తున్నారు కదా అని ఎవరైనా ప్రశ్నించే అవకాశం ఉంది' అని అన్నారు. షమీ టీమిండియా తరఫున 30 టెస్టుల్లో, 50 వన్డేల్లో, 7 టీ20ల్లో ఆడాడు.