హైదరాబాద్: న్యూజిలాండ్లోని ఆక్లాండ్ వేదికగా జరిగిన ఓ దేశవాళీ టోర్నీలో నమోదైన ఓ సిక్సు క్రికెట్ అభిమానులను ఆశ్చర్యానికి గురి చేస్తోంది. సాధారణంగా సిక్సులంటే బ్యాట్స్మెన్ బాదిన బంతి అమాంతం గాల్లో బౌండరీ అవతల పడుతుంది. ధోని, క్రిస్ గేల్ లాంటి ఆటగాళ్లు కొట్టిన సిక్సులు స్టేడియం బయటపడటాన్ని కూడా మనం ఛూశాం.
అయితే ఈ గమ్మత్తు అయిన సిక్సు మాత్రం ఆక్లాండ్లోని పుకెకురా పార్క్ వేదికగా జరిగిన మ్యాచ్లో చోటు చేసుకుంది. ఈ దేశవాళీ టోర్నీలో ఆక్లాండ్-క్యాంటెర్బరీ జట్లు తలపడ్డాయి. ఇన్నింగ్స్ 19 ఓవర్లో ఆక్లాండ్ బ్యాట్స్మన్ జీత్ రావల్ కొట్టిన ఈ సిక్స్ వీడియో సోషల్ మీడియాలో వైరల్ అయింది.
That is one tough nut. The stroke was recorded as 6, one bounce off Andrew Ellis's scone. Passed the concussion test & carried on....😬 #FordTrophy pic.twitter.com/2zsfLCI3qd
— #NZIII (@MargotButcher) February 20, 2018
క్యాంటెర్బరీ కెప్టెన్ ఆండ్రూ ఎల్లిస్ వేసిన ఓవర్లో బ్యాట్స్మన్ జీత్ రావల్ బాదిన బంతి నేరుగా బౌలర్ ఎల్లిస్ తలకు బలంగా తగిలి నేరుగా బౌండర్ అవతల పడింది. తొలుత అంపైర్ ఫోర్ ఇవ్వగా రిప్లేలో సిక్స్ అని తేలడంతో అందరు ఒకింత ఆశ్చర్యానికి గురయ్యారు.
అయితే బంతి బౌలర్ తలను బలంగా తాకడంతో ఒక్కసారిగా మైదానంలోని ఆటగాళ్లు ఆందోళనకు గురయ్యారు. ఎల్లిస్కు ఎలాంటి గాయం కాకపోవడంతో ఊపిరి పీల్చుకున్నారు. ఈ మ్యాచ్లో జీత్ రావెల్ అద్భుత సెంచరీ సాధించడంతో ఆక్లాండ్ విజయం సాధించింది.
మ్యాచ్ అనంతరం జీత్ రావల్ మాట్లాడుతూ 'ఆండ్రూ ఎల్లిస్ గాయపడ్డాడని చాలా కంగారు పడ్డా. నా వల్ల అతనికి గాయమైందో ఏమోనని ఆందోళన చెందా. కానీ అతనికేం కాలేదు. దీంతో ఊపిరి పీల్చుకున్నా. ఇలాంటి అనుభవం ఎవరికి ఎదురుకాలేదనుకుంటా' అని అన్నాడు.