అలా అయితే మ్యాచ్‌లు గెలవలేం: దూకుడు మన రక్తంలోనే ఉందన్న క్లార్క్

ఆస్ట్రేలియా ఆటగాళ్ల దూకుడు కాస్త నెమ్మదించింది

ఈ ఏడాది సఫారీ గడ్డపై చోటు చేసుకున్న బాల్‌ టాంపరింగ్ ఉదంతం కారణంగా ఆ జట్టు ఆటగాళ్లు స్టీవ్‌స్మిత్‌, డేవిడ్‌ వార్నర్‌ ఏడాది నిషేధానికి గురికావడంతో ఆస్ట్రేలియా ఆటగాళ్ల దూకుడు కాస్త నెమ్మదించింది. అంతకముందు ప్రత్యర్ధి జట్టుపై స్లెడ్జింగ్‌కు ఎంతమాత్రం వెనుకాడని ఆస్ట్రేలియన్లు, ఇప్పుడు మైదానంలో ప్రశాంతంగా కనిపిస్తున్నారని క్లార్క్‌ విమర్శించాడు.

మైకేల్ క్లార్క్ మాట్లాడుతూ

తాజాగా ఓ స్పోర్ట్స్ రేడియోకి ఇచ్చిన ఇంటర్యూలో మైకేల్ క్లార్క్ మాట్లాడుతూ "ఆస్ట్రేలియా క్రికెట్‌ను అందరూ ఇష్టపడాలని, గౌరవించేలా చేసుకోవాలని దిగులు పడటం మానుకోవాలి. ఆస్ట్రేలియా తరహాలో కఠినమైన, దూకుడైన క్రికెట్‌ ఆడాలి. ఇష్టమున్నా లేకున్నా అది మన రక్తంలోనే ఉంది. మనం ప్రశాతంగా ఆడితే అందరూ ఇష్టపడొచ్చేమో గానీ మ్యాచ్‌లు గెలవలేం" అని అన్నాడు.

దూకుడుగా ఉండటం డేవిడ్‌ వార్నర్‌ శైలి

"దూకుడుగా ఉండటం డేవిడ్‌ వార్నర్‌ శైలి. అతడిలో ఏం చూస్తే అదే కనిపిస్తుంది. ఒక కెప్టెన్‌గా అతనెప్పుడూ నా జట్టులో ఉండటం నాకిష్టం. ఎందుకంటే అతడు జట్టుకు అవసరమైన దూకుడు అందిస్తాడు. దూకుడు హద్దులేమిటో అతడికి తెలుసు. హద్దు దాటొద్దని మేమిద్దరం చాలాసార్లు సంభాషించాం" అని మైకేల్ క్లార్క్ అన్నాడు.

డిసెంబర్ 6న అడిలైడ్ వేదికగా తొలి టెస్టు

నాలుగు టెస్టు మ్యాచ్‌ల సిరిస్‌లో భాగంగా డిసెంబర్ 6న అడిలైడ్ వేదికగా తొలి టెస్టు ప్రారంభం కానుంది. ఈ టెస్టు సిరిస్‌లో టీమిండియా ఫేవరేట్‌గా బరిలోకి దిగుతోంది. ఆసీస్ పర్యటనలో ఇప్పటికే ముగిసిన మూడు టీ20ల సిరిస్‌ను కోహ్లీసేన 1-1తో సమం చేసింది. తొలి టీ20లో ఆసీస్ నెగ్గగా, మూడో టీ20లో భారత్ విజయం సాధించింది. వర్షం కారణంగా రెండో టీ20 రద్దైంది.