మంచి ఆరంభమే:
ఓవల్ మైదానంలో జరుగుతున్న ఐదో టెస్టులో ఓవర్నైట్ స్కోరు 9/0తో శనివారం రెండో ఇన్నింగ్స్ కొనసాగించిన ఇంగ్లండ్ ఆట ముగిసేసరికి 91 ఓవర్లలో 8 వికెట్ల నష్టానికి 313 పరుగులు చేసింది. రెండో ఇన్నింగ్స్ కొనసాగించిన ఇంగ్లండ్కు మంచి ఆరంభమే లభించింది. తొలి వికెట్కు 54 పరుగులు జోడించాక బర్న్స్ (20) ఔటయ్యాడు. కుదురుకున్నట్లే అనిపించిన కెప్టెన్ జో రూట్ (21) కూడా త్వరగానే పెవిలియన్ చేరాడు.
డెన్లీ పోరాటం:
ఈ దశలో ఓపెనర్ జో డెన్లీ (206 బంతుల్లో 94; 14 ఫోర్లు, 1 సిక్స్) అద్భుత పోరాటం చేసాడు. బెన్ స్టోక్స్ (67; 5 ఫోర్లు, 2 సిక్సర్లు) అండతో విలువైన ఇన్నింగ్స్ ఆడాడు. స్టోక్స్తో కలిసి ఇన్నింగ్స్ను గాడిలో పెట్టాడు. వీరిద్దరూ మూడో వికెట్కు 127 పరుగులు జతచేశారు. అయితే సిడిల్ దెబ్బకు డెన్లీ తృటిలో సెంచరీ చేజార్చుకోగా.. లయన్ స్టోక్స్ను ఔట్ చేసాడు. అనంతరం జోస్ బట్లర్ (47; 6 ఫోర్లు) బ్యాట్ జులిపించాడు.
ఛేదన ఆసీస్కు కష్టమే:
సామ్ కర్రన్, క్రిస్ వోక్స్ అండగా బట్లర్ పరుగులు చేసి ఇంగ్లండ్ స్కోరును 300 దాటించాడు. అయితే అర్ధ సెంచరీ ముందు బట్లర్ను సిడిల్ పెవిలియన్ చేర్చాడు. ఆట ముగిసే సమయానికి జోఫ్రా ఆర్చర్ (3 బ్యాటింగ్), లీచ్ (5 బ్యాటింగ్) క్రీజులో ఉన్నారు. ఆసీస్ స్పిన్నర్ లియాన్ (3/65) మూడు వికెట్లు పడగొట్టగా.. సిడిల్, మార్ష్కు చెరో రెండు వికెట్లు దక్కాయి. రెండు రోజుల ఆట ఉన్నప్పటికీ.. దాదాపు 400 పరుగుల ఛేదన ఆసీస్కు చాలా కష్టమే. ఇంగ్లండ్ తొలి ఇన్నింగ్స్లో 294 పరుగులు చేయగా.. ఆస్ట్రేలియా 225 స్కోరు చేసింది.