ప్రమోషన్ అదిరింది: రోడ్డుపైకి 65 వేల మంది ఇండోనేషియన్లు (వీడియో)

ఆసియా గేమ్స్‌లోనే క్రీడాంశాలు ఎక్కువ

కామన్వెల్త్‌ క్రీడల్లో ఇంతకంటే ఎక్కువ (71) దేశాలు పాల్గొంటునప్పటికీ, క్రీడాంశాలను లెక్కలోకి తీసుకుంటే మాత్రం ఆసియా క్రీడల్లోనే ఎక్కువగా ఉండటం విశేషం. ప్రస్తుతం జరగబోయే ఆసియా గేమ్స్‌లో 45 దేశాలు పాల్గొననున్నాయి. మొత్తం 40 క్రీడాంశాల్లోని 465 ఈవెంట్లకు పోటీలు జరుగనున్నాయి.

ఆగస్టు 18 నుంచి సెప్టంబర్ 2 వరకు

ఈసారి పోటీలకు ఇండోనేసియాలోని జకార్తా, పాలెంబాంగ్‌ నగరాలు ఆతిథ్యం ఇవ్వనున్నాయి. ఇలా రెండు నగరాలు వేదికగా నిలవడం ఆసియా క్రీడల చరిత్రలో ఇదే తొలిసారి కావడం విశేషం. ఆసియా గేమ్స్ నేపథ్యంలో ఈ రెండు నగరాలను అందంగా అలంకరిస్తున్నారు. మరోవైపు ఆసియన్ గేమ్స్‌ను ప్రమోట్ చేసేందుకు ఇండోనేషియన్లు వినూత్న పద్ధతులు అవలంబిస్తున్నారు.

అతిపెద్ద సామూహిక డ్యాన్స్‌గా గిన్నిస్ రికార్డు

ఆదివారం 65 వేల మంది ఇండోనేషియన్లు తెల్లని దుస్తులు ధరించి ఒక్కసారిగా జకార్తా వీధుల్లోకి వచ్చారు. అధ్యక్షుడు జోకో విడోడో కూడా వారితో జతకలిశారు. అందరూ కలిసి ఇండోనేషియా సాంప్రదాయ నృత్యం ‘పోకో-పోకో' డ్యాన్స్ చేశారు. ప్రపంచంలోనే అతిపెద్ద సామూహిక డ్యాన్స్‌గా ఇది గిన్నిస్ రికార్డు సృష్టించింది.

అందరినీ ఆకర్షించిన పోకో-పోకో డ్యాన్స్‌

ఈ ప్రయత్నం ప్రపంచ వ్యాప్తంగా ఉన్న అందరినీ ఆకర్షించింది. కాగా, అదే సమయంలో దేశంలోని వివిధ జైళ్లలో ఉన్న 1.20 లక్షల మందికిపైగా ఖైదీలు కూడా డ్యాన్స్ చేయడం విశేషం. పోకో-పోకో డ్యాన్స్‌తో తమకు ప్రపంచ గుర్తింపు లభిస్తుందని ఈ సందర్భంగా ఇండోనేషియన్లు ఆశాభావం వ్యక్తం చేయడం విశేషం.