వరల్డ్ కప్ నుంచి నిష్క్రమించిన జర్మనీ
మెక్సికో చేతిలో పరాభవంతో టోర్నీని ఆరంభించి స్వీడన్పై అతి కష్టం మీద గట్టెక్కిన జర్మనీ.. నాకౌట్ చేరాలంటే తప్పక గెలవాల్సిన చివరి మ్యాచ్లో 0-2తో దక్షిణ కొరియా చేతిలో ఓడిపోయింది. దీంతో మూడు మ్యాచ్ల్లో కలిపి మూడు పాయింట్లే సాధించిన జర్మనీ అనూహ్య రీతిలో గ్రూప్ దశలోనే వరల్డ్ కప్ నుంచి నిష్క్రమించింది.
సంబరాలు చేసుకున్న మెక్సికన్లు
"ఓ ఆసియా దేశం ఢిపెండింగ్ ఛాంపియన్ను చిత్తు చేయటం మాములు విషయం కాదు. పైగా మాకు అవకాశం దక్కుతుందా? అన్న టెన్షన్లో ఉన్నాం. ఇలాంటి తరుణంలో దక్షిణ కొరియా పోరాటం మాకు మధురానుభూతిని మిగిల్చింది. అందుకే ఈ సెలబ్రేషన్స్" అని మెక్సికన్లు అన్నారు.
కొరియా జట్టుపైనా మేం గెలవలేకపోయాం
జర్మనీ ఓటమిపై జోకిమ్ లూ మాట్లాడుతూ "‘నేను షాకయ్యాను. కొరియా జట్టుపైనా మేం గెలవలేకపోయాం. ఇలాంటి ఆటతో ఎలా ముందుకెళ్లగలం? దీనిపై మేం ప్రశాంతంగా కూర్చుని మాట్లాడుకోవాలి. ఇప్పుడు ఇంతకుమించి ఏమీ మాట్లాడలేను. మా నిష్క్రమణ నన్ను నిరాశకు గురి చేయలేదు" అని అన్నాడు.
1938 తర్వాత ఇదే తొలిసారి
ప్రపంచకప్లో ఒక ఆసియా జట్టు చేతిలో జర్మనీ ఓడటం ఇదే తొలిసారి. కాగా, 1938 తర్వాత జర్మనీ ప్రపంచకప్ గ్రూప్ దశలో నిష్క్రమించడం ఇదే తొలిసారి. దక్షిణ కొరియా జర్మనీని ప్రపంచకప్లో ఓడించడం కూడా ఇదే తొలిసారి. గతంలో ఆ జట్టుతో తలపడ్డ రెండుసార్లూ ఓడింది. ప్రస్తుత టోర్నీతో కలిపి గత ఐదు ప్రపంచకప్ల్లో డిఫెండింగ్ ఛాంపియన్ గ్రూప్ దశలోనే నిష్క్రమించడం ఇది నాలుగోసారి.
2010లో జరిగిన వరల్డ్ కప్లో ఇటలీ సరిగ్గా ఇలానే
2006 ఛాంపియన్ ఇటలీ 2010లో జరిగిన వరల్డ్ కప్లో సరిగ్గా ఇలానే గ్రూప్ దశలోనే నిష్క్రమించింది. 2010 విజేత స్పెయిన్ 2014లో కూడా ఇలానే నిష్క్రమించింది. రెండేసి విజయాలు సాధించిన స్వీడన్, మెక్సికో ఆరు పాయింట్లతో గ్రూప్-ఎఫ్ నుంచి నాకౌట్కు అర్హత సాధించాయి. అయితే మెరుగైన గోల్స్ సగటు ఆధారంగా స్వీడన్ గ్రూప్లో అగ్రస్థానంలో నిలిచింది. మెక్సికోకు రెండో స్థానం దక్కింది.