ఆర్చర్‌ బౌన్సర్‌ను ఎదుర్కొనడంలో స్మిత్‌ చేసిన పొరపాటిదే: సచిన్ విశ్లేషణ

స్మిత్‌ బ్యాటింగ్‌ టెక్నిక్‌ గురించి

స్టీవ్ స్మిత్‌ బ్యాటింగ్‌ టెక్నిక్‌ గురించి సచిన్ వివరించిన తీరు అభిమానులను విశేషంగా ఆకట్టుకుంటోంది. "ఎడ్జిబాస్టన్ వేదికగా జరిగిన తొలి టెస్టులో స్మిత్‌ను స్లిప్‌‌లో ఔట్‌ చేసేందుకు ప్రయత్నించారు. కానీ స్మిత్‌ అడ్డంగా అటు ఇటూ కదులుతూ తన లెగ్‌స్టంప్‌ను పూర్తిగా కనిపించేలా ఆడాడు. ఆఫ్‌స్టంప్‌ అవతల పడిన బంతులను పూర్తిగా వదిలేశాడు. దీంతో ఇంగ్లాండ్‌ పేసర్లు అతడిని ఔట్ చేయడంలో ఇబ్బంది పడ్డారు" అని అన్నాడు.

ఆర్చర్‌ వేసిన బౌన్సర్‌ను ఎదుర్కొనడంలో

లార్డ్స్ వేదికగా జరిగిన రెండో టెస్టులో ఇంగ్లాండ్ పేసర్ జోఫ్రా ఆర్చర్‌ వేసిన బౌన్సర్‌ను ఎదుర్కొనడంలో స్మిత్‌ చేసిన పొరపాటుపై కూడా సచిన్ టెండూల్కర్ స్పందించాడు. "లార్డ్స్‌ టెస్టులో అతడికి లెగ్‌ స్లిప్‌ను పెట్టాలని ఇంగ్లాండ్‌ నిర్ణయించింది. జోఫ్రా ఆర్చర్‌ బౌన్సర్లతో అతడిని ఇబ్బంది పెట్టాడు. ఆర్చర్ లైన్ అండ్ లెంత్ బంతులు వేయడంతో బ్యాక్‌ఫుట్‌పై ఆడడంతో స్మిత్‌ ఇబ్బంది పడ్డాడు. ఆర్చర్‌ ఎప్పుడు షార్ట్‌ బాల్‌ వేసినా స్మిత్‌ పుల్‌ చేయడానికి ప్రయత్నించలేదు. డిఫెండ్‌ చేశాడు. అందువల్లే అతడి తలకు బంతి తగిలింది" అని సచిన్ చెప్పుకొచ్చాడు.

స్మిత్‌ వెనక్కి వంగకుండా ముందుకు

"ఇక, నాలుగో టెస్టులో స్మిత్‌ వెనక్కి వంగకుండా ముందుకు వంగుతూ బంతులను వదిలి పెట్టడంపైనే శ్రద్ధ చూపించాడు. దీంతో జోఫ్రా ఆర్చర్‌ షార్ట్‌ బంతితో పరీక్షించినా స్మిత్‌ తన భుజాన్ని ముందు వంచుతూ బంతిని జారవిడిచాడు. అయితే, గత మ్యాచ్‌ల్లో ఆడినట్లుగా ఆడితే ఇబ్బంది పడేవాడు. రెండో టెస్టు దెబ్బకు స్మిత్ ఆ తర్వాత తన టెక్నిక్‌ను మరింతగా మార్చుకున్నాడు" అని సచిన్ పేర్కొన్నాడు.