శ్రీకాంత్‌కు ప్రశంసల వెల్లువ: ప్రధాని మోడీతో సహా ఎవరేమన్నారు?

హైదరాబాద్: ఒలింపిక్ ఛాంపియన్ చెన్‌లాంగ్‌ని ఓడించి ఆస్ట్రేలియన్ ఓపెన్‌లో భారత జాతీయ జెండాను రెపరెపలాడించిన భారత స్టార్ షట్లర్, తెలుగు తేజం కిదాంబి శ్రీకాంత్‌పై ప్రశంసల వర్షం కురుస్తోంది. ఆస్ట్రేలియన్ ఓపెన్ ఫైనల్లో భారత స్టార్‌ షట్లర్‌, తెలుగు తేజం కిదాంబి శ్రీకాంత్‌ సంచలన విజయాన్ని నమోదు చేసిన సంగతి తెలిసిందే.

ఆదివారం జరిగిన ఫైనల్లో ప్రపంచ 11వ ర్యాంకర్‌ శ్రీకాంత్‌ 22-20, 21-16తో వరుస గేముల్లో ఒలింపిక్‌ చాంపియన్‌ చెన్‌లాంగ్‌పై విజయం సాధించాడు. ఇటీవలే ఇండోనేషియా సూపర్‌ సిరీస్‌ ప్రిమియర్‌ గెలిచిన అతడికిది వరుసగా రెండో టైటిల్‌ కావడం విశేషం. 46 నిమిషాల ఏకపక్ష పోరులో ఆరో ర్యాంకర్‌ చెన్‌లాంగ్‌ భారత షట్లర్‌కు ఏమాత్రం గట్టి పోటీ ఇవ్వలేకపోయాడు.

గతంలో తలపడిన ఐదుసార్లూ శ్రీకాంత్‌ను ఓడించిన చెన్‌లాంగ్‌.. ఈసారి మాత్రం భారత షట్లర్‌ ఎటాకింగ్‌ గేమ్‌ ముందు తలొంచాడు. ఇదిలా ఉంటే మొత్తంగా శ్రీకాంత్‌కు కెరీర్‌లో ఇది నాలుగో సూపర్‌ సిరీస్‌ టైటిల్‌ కావడం విశేషం. అలాగే వరుసగా మూడు సూపర్‌ సిరీస్‌ (సింగపూర్‌, ఇండోనేసియా, ఆస్ట్రేలియన్‌ ఓపెన్‌) ఫైనల్స్‌ ఆడిన ఐదో క్రీడాకారుడిగా కిదాంబి శ్రీకాంత్ చరిత్ర సృష్టించాడు.

ఆస్ట్రేలియన్ ఓపెన్ విజేతగా నిలిచిన కిదాంబి శ్రీకాంత్‌ను ప్రధాని మోడీతో సహా క్రికెట్ లెజెండ్ సచిన్ టెండూల్కర్, తెలుగు రాష్ట్రాల ముఖ్యమంత్రులతో పాటు పలువురు అభినందించారు.