బౌండరీలు బాదాలనే ప్రణాళికతో బరిలోకి దిగాం: తొలి టీ20లో హాఫ్ సెంచరీపై కేఎల్ రాహుల్

వరల్డ్‌కప్‌కు ఇంకా సమయం ఉంది

"వరల్డ్‌కప్‌కు ఇంకా సమయం ఉంది. దానికి ముందు చాలా మ్యాచులు ఆడాల్సి ఉంది. ఇక్కడ వికెట్‌ బ్యాటింగ్‌కు అంత అనుకూలంగా లేదు. 200 పరుగుల లక్ష్యంతో బరిలోకి దిగినప్పుడు ఎదురుదాడికి దిగుతూ బ్యాటింగ్‌ చేయాలి. గెలవాలంటే పది రన్‌రేటుతో పరుగులు చేయాల్సి ఉంటుంది" అని కేఎల్ రాహుల్ చెప్పుకొచ్చాడు.

భారీ లక్ష్యం ముందుండటంతో

"భారీ లక్ష్యం ముందుండటంతో బౌండరీలు బాదాలనే ప్రణాళికతో బరిలోకి దిగాం. విరాట్ కోహ్లీ అద్భుతంగా పోరాడి జట్టును విజయ తీరాలకు చేర్చాడు" అని కేఎల్ రాహుల్‌ అన్నాడు. కాగా, తొలి టీ20లో కోహ్లీతో కలిసి కేఎల్ రాహుల్ రెండో వికెట్‌కు సెంచరీకి పైగా భాగస్వామ్యాన్ని నమోదు చేశాడు.

కేఎల్ రాహుల్ అరుదైన ఘనత

అంతేకాదు ఈ మ్యాచ్‌లో కేఎల్ రాహుల్ అరుదైన ఘనత సాధించాడు. టీ20ల్లో 1000 పరుగులు సాధించిన భారత 7వ క్రికెటర్‌గా నిలిచాడు. టీ20ల్లో అత్యంత వేగంగా ఈ మైలురాయిని అందుకున్న మూడో క్రికెటర్‌గా కేఎల్ రాహుల్ అరుదైన రికార్డుని తన ఖాతాలో వేసుకున్నాడు. కేఎల్ రాహుల్ తన 29వ ఇన్నింగ్స్‌లో వెయ్యి పరుగుల క్లబ్‌లో చేరాడు.

ఆరోన్ ఫించ్ సరసన

ఈ క్రమంలో ఆస్ట్రేలియా టీ20 జట్టు కెప్టెన్ ఆరోన్ ఫించ్ సరసన కేఎల్ రాహుల్ నిలిచాడు. ఇదిలా ఉంటే, టీ20ల్లో అత్యంత వేగంగా వెయ్యి పరుగులు సాధించిన ఆటగాళ్ల జాబితాలో పాకిస్థాన్ యువ ఆటగాడు బాబర్ అజామ్(26 ఇన్నింగ్స్‌లు) అగ్రస్థానంలో ఉండగా, కొహ్లీ(27 ఇన్నింగ్స్)లతో రెండో స్థానంలో ఉన్నాడు.