ధోనీ ఇంకా ఏం సాధించాలి:
కెరీర్లో ఇప్పటికే అన్ని ఘనతలు సాధించిన ఎంఎస్ ధోనీ మళ్లీ రీఎంట్రీ ఇవ్వాల్సిన అవసరం లేదని సయ్యద్ కీర్మాణీ చెప్పుకొచ్చాడు. 'ధోనీకి ఎప్పుడు ఏం చేయాలో తెలుసు. అందుకే అతను తన భవిష్యత్ ప్రణాళికల గురించి మాట్లాడకుండా మౌనంగా ఉంటున్నాడు. నా అంచనా ప్రకారం అతను మళ్లీ టీమిండియాకి ఆడతాడనుకోవట్లేదు. ఎందుకంటే ఇప్పటికే అతను తన లక్ష్యాల్ని, కలల్ని సాకారం చేసుకున్నాడు. ఇక అతను సాధించాల్సింది ఏమీ లేదు. మీడియాలో కథనాల ప్రకారం నాకు అర్థమైంది ఒకటే.. ఐపీఎల్ 2020లో ఆడేందుకు అతడు ఆసక్తిగా ఎదురుచూస్తున్నాడు. బహుశా ఐపీఎల్-13 సీజన్ అతనికి ఆఖరిది కావొచ్చు' అని కీర్మాణీ పేర్కొన్నాడు.
మూడు ఐసీసీ టోర్నీలు గెలిచిన ఏకైక కెప్టెన్:
బంగ్లాదేశ్తో 2004లో జరిగిన వన్డే మ్యాచ్తో అంతర్జాతీయ క్రికెట్లోకి అరంగేట్రం చేసిన ఎంఎస్ ధోనీ.. మహ్మద్ కైఫ్ కారణంగానే ఆ మ్యాచ్లో రనౌట్ అయ్యాడు. ఆ తర్వాత ఆడిన మూడు మ్యాచ్ల్లోనూ విఫలమయ్యాడు. దీంతో ధోనీ కెరీర్ ముగిసినట్లేనని అందరూ భావించారు. కానీ విశాఖ తీరాన విధ్వంసంతో (123 బంతుల్లో 15 ఫోర్లు 4 సిక్స్లతో 148 రన్స్) ధోనీ మైదానంలో తిరుగులేని శక్తిగా ఎదిగాడు. ప్రపంచంలోనే అత్యుత్తమ సారథిగా నిలిచాడు. 2007లో టీ20 ప్రపంచకప్, 2011లో వన్డే ప్రపంచకప్, 2013లో ఛాంపియన్స్ ట్రోఫీలో కెప్టెన్గా భారత్ని విజేతగా నిలిపిన ధోనీ.. క్రికెట్ చరిత్రలో ఓ మూడు ఐసీసీ టోర్నీలు గెలిచిన ఏకైక కెప్టెన్గా రికార్డుల్లో కొనసాగుతున్నాడు.
10 నెలలుగా క్రికెట్కి దూరం:
2019 వన్డే ప్రపంచకప్ తర్వాత ఎంఎస్ ధోనీ టీమిండియాకి దూరమయ్యాడు. బీసీసీఐ సెలక్షన్కు కూడా అందుబాటులో ఉండడం లేదు. దీంతో సెంట్రల్ కాంట్రాక్టు నుండి అతనిని బీసీసీఐ తప్పించింది. ఇక మహీ స్థానంలో రిషబ్ పంత్, కేఎల్ రాహుల్కి భారత సెలక్టర్లు వరుసగా అవకాశాలిచ్చారు. ఈ ఇద్దరిలో పంత్ ఫెయిలవగా.. రాహుల్ వన్డే, టీ20ల్లో వికెట్ కీపర్-బ్యాట్స్మెన్గా రాణించాడు. ప్రస్తుతం రాహుల్ టీ20 ప్రపంచకప్ రేసులో ఉన్నాడు.
డైలమాలో ధోనీ క్రికెట్ భవిష్యత్తు:
కరోనా వైరస్ మహమ్మారి కారణంగా ఐపీఎల్ 2020 నిరవధిక వాయిదా పడింది. దీంతో ధోనీ ప్రొఫెషనల్ క్రికెట్లోకి తిరిగి రావడాన్ని ఆలస్యం చేసింది. ఐపీఎల్లో మహీ బాగా రాణించినట్లయితే.. అక్టోబర్-నవంబర్లో జరిగే టీ20 ప్రపంచకప్ ఆడే అవకాశం ఉండేది. కానీ పరిస్థితి ఇప్పుడు అలా లేదు. లీగ్ ఎప్పుడు ప్రారంభమవుతుందో కచ్చితంగా చెప్పలేం. దీంతో ధోనీ అంతర్జాతీయ క్రికెట్ భవిష్యత్తు డైలమాలో పడింది.