ధోని వికెట్ల వెనుక ఉంటే... క్రీజు వదలొద్దు: క్రికెటర్లకు ఐసీసీ సలహా

ఇన్నింగ్స్ 37వ ఓవర్

ఇన్నింగ్స్ 37వ ఓవర్ వేసిన కేదార్ జాదవ్ బౌలింగ్‌లో బంతిని స్వీప్ చేసేందుకు నీషమ్ ప్రయత్నించాడు. అయితే, అతడి శరీరాన్ని తాకిన బంతి ధోని పక్క నుంచి వికెట్లకి దూరంగా వెళ్లింది. బంతి ఎక్కడికి వెళ్లిందోనని తెలుసుకునేందుకు కొన్ని క్షణాల సమయం తీసుకున్నాడు. అదే సమయంలో వికెట్ల వెనుకన ఉన్న బంతిని చూసి పరుగు కోసం సాహసోపేతంగా క్రీజు వెలుపలికి వెళ్లాడు.

ధోని రెప్పపాటులో

అయితే.. అప్పటికే బంతిని అందుకున్న ధోని రెప్పపాటులో దానిని వికెట్లపైకి విసిరాడు. ధోని త్రోని ఊహించలేకపోయిన నీషమ్ పేలవంగా రనౌటై నిరాశగా పెవిలియన్‌కు చేరాడు. ఇది ఆతిథ్య జట్టు విజయవకాశాలను దెబ్బతీసింది. ఇలా వికెట్ల వెనుక చాకచక్యంగా వ్యవహరించిన ధోనిపై ప్రస్తుతం సోషల్‌ మీడియాలో ప్రశంసల జల్లు కురుస్తోంది.

ధోని వెనుకాల ఉంటే

ధోని వెనుకాల ఉంటే బ్యాట్స్‌మెన్‌ క్రీజ్‌ వీడడమా? అంటూ కామెంట్‌ చేస్తున్నారు. ఈ నేపథ్యంలో ఓ అభిమాని ధోని విషయంలో బ్యాట్స్‌మెన్‌కు సలహా ఇవ్వండని అంతర్జాతీయ క్రికెట్ కౌన్సిల్(ఐసీసీ)ని కోరాడు. దీనికి ఐసీసీ తన ట్విట్టర్‌లో 'స్టంప్స్‌ వెనుక ధోని ఉన్నాడంటే ఎప్పుడూ క్రీజ్‌ను వీడొద్దు' అని ట్వీట్ చేసింది.

రనౌట్ అయిన జేమ్స్ నీషమ్‌

మరోవైపు రనౌట్ అయిన న్యూజిలాండ్ క్రికెటర్ జేమ్స్ నీషమ్‌ నిందిస్తూ సోషల్ మీడియాలో అభిమానులు కామెంట్స్‌ చేశారు. దీంతో అభిమానులకు నీషమ్‌ వివరణ ఇచ్చుకున్నాడు. ‘సలహాలిచ్చిన ప్రతి ఒక్కరికి ధన్యవాదాలు. నేను బంతినే చూశాను. కెమెరాలు నా ఐబాల్‌ను కూడా క్యాచ్‌ చేశాయి' అని ట్వీట్ చేశాడు.