అర్జున్‌ను ఆడించకపోవడంతో ముంబైపై దుమ్మెత్తిపోస్తున్న నెటిజన్లు.. ట్విట్టర్లో ట్రోల్స్

వరుసగా రెండేళ్ల పాటు అర్జున్‌కు అన్యాయం

సచిన్ టెండూల్కర్ కుమారుడు అర్జున్ టెండూల్కర్‌ను గత ఏడాది ఐపీఎల్ మినీ వేలంలో ముంబై ఇండియన్స్ ఫ్రాంఛైజీ బేస్ ధరకే కొనుక్కుంది. అయినప్పటికీ ఐపీఎల్ 2021ఎడిషన్‌లో అతన్ని ముంబై ఒక్క మ్యాచ్ కూడా ఆడించలేదు. ఇక ఈ సీజన్‌కు ముందు అర్జున్ టెండూల్కర్ కోసం రూ.30లక్షల ధర వెచ్చించి మళ్లీ ముంబై అతన్ని దక్కించుకుంది.

ఇకపోతే ముంబై జట్టులో బెంచ్ మీద ఉన్న దాదాపు అందరూ ఆటగాళ్లకు ఈ సీజన్లో అవకాశాలొచ్చాయి. కానీ కేవలం అర్జున్ టెండూల్కర్‌కు మాత్రం ముంబై మొండిచేయి చూపించింది. దీంతో అతన్ని తుది జట్టులో చూడాలనుకున్న అభిమానులు నిరాశచెందారు. ఇక ముంబై జట్టును వీడితే కానీ అర్జున్ టెండూల్కర్ కు మోక్షం దక్కదని పలువురు కామెంట్లు చేస్తున్నారు. ఇక ఐపీఎల్లో అరంగేట్రం చేయాలంటే మరో ఏడాది వరకు అర్జున్ టెండూల్కర్ వేచి చూడాల్సిన పరిస్థితి నెలకొంది.

సచిన్ కొడుకు అయినందుకేనా ఇలా?

ఓ నెటిజన్ పేర్కొంటూ.. ముంబై ఇండియన్స్ జట్టు సచిన్ కొడుకని కాదు గానీ ఓ క్రీడాకారుడి భవిష్యత్తును దెబ్బతీస్తోంది. మీరు ఆడించలేకపోతే ఇంకో జట్టుకు అతన్ని అమ్మేయండి. అలాగైనా అతను ఐపీఎల్లో ఆడగలుగుతాడు అని పేర్కొన్నాడు. మరో నెటిజన్ స్పందిస్తూ.. ముంబై అసలెందుకు అర్జున్ టెండూల్కర్ ను కొన్నట్టు. కేవలం నెట్ బౌలర్ గా తీసుకుంటే అయిపోయేదిగా. పాపం అతన్ని మరీ చిన్నపిల్లాడిలా చూస్తున్నారంటూ వాదించాడు. మరో నెటిజన్ అయితే నెపోటిజం కారణంగా లబ్ధి పొందని ఏకైక ప్లేయర్ అర్జున్ టెండూల్కరే కావొచ్చు అంటూ సానుభూతి ప్రకటించాడు.

ఇకపోతే ఈ మ్యాచ్‌లో ఆడుతున్న ముంబై ప్లేయింగ్ 11 జట్టు

ప్లేయింగ్ XI: రోహిత్ శర్మ(కెప్టెన్), ఇషాన్ కిషన్(వికెట్ కీపర్), డేనియల్ సామ్స్, తిలక్ వర్మ, డెవాల్డ్ బ్రెవిస్, టిమ్ డేవిడ్, రమణదీప్ సింగ్, హృతిక్ షోకీన్, జస్ప్రీత్ బుమ్రా, రిలే మెరెడిత్, మయాంక్ మార్కండే

బెంచ్ మీద ఉన్న ప్లేయర్లు : కీరన్ పొలార్డ్, జయదేవ్ ఉనద్కత్, మురుగన్ అశ్విన్, ఫాబియన్ అలెన్, బాసిల్ థంపి, అన్మోల్‌ప్రీత్ సింగ్, ఆర్యన్ జుయల్, అర్జున్ టెండూల్కర్, కుమార్ కార్తికేయ, ఆకాష్ మధ్వల్, రాహుల్ బుద్ధి, ట్రిస్టన్ స్టబ్స్, సంజయ్ యాదవ్