India vs Australia: అయ్యో పుజారా.. 10 సార్లు అతని బౌలింగ్‌లోనే!!

10 సార్లు లైయన్‌ బౌలింగ్‌లోనే

రెండు సెషన్ల పాటు చెటేశ్వర్ పుజారా ఆసీస్ బౌలర్లకు చుక్కలు చూపించాడు. వారి సహనానికి పరీక్షపెట్టాడు. చివరకు భారత ఇన్నింగ్స్‌ 50వ ఓవర్లో ఆసీస్‌ ఆఫ్‌ స్పిన్నర్‌ నాథన్‌ లైయన్‌ బౌలింగ్‌లో ఔటయ్యాడు. టెస్టుల్లో లైయన్‌ బౌలింగ్‌లో పుజారా ఔటవడం ఇది పదోసారి కావడం గమనార్హం. సుదీర్ఘ ఫార్మాట్‌లో పుజారా ఎక్కువసార్లు లైయన్‌ బౌలింగ్‌లోనే పెవిలియన్ చేరాడు. పుజారాను ఎక్కువసార్లు ఔట్ చేసిన జాబితాలో ఇంగ్లాండ్‌ పేసర్‌ జేమ్స్‌ అండర్సన్‌ రెండో స్థానంలో ఉన్నాడు. పుజారాను అండర్సన్‌ ఏడుసార్లు ఔట్‌ చేశాడు.

148 బంతికిగానీ

డే/నైట్‌ టెస్టు మ్యాచ్‌లో చెటేశ్వర్ పుజారా తన మార్క్ ఇన్నింగ్స్‌తో ఆకట్టుకున్నాడు. గులాబీ బంతితో జరుగుతున్న ఈ మ్యాచ్‌లో.. ఫాస్ట్ బౌలర్లకి మొదట పిచ్ అనుకూలించడం, కొత్త బంతి నుంచి స్వింగ్ లభిస్తుండటంతో పుజారా అతి జాగ్రత్తగా బ్యాటింగ్ చేశాడు. తొలి సెషన్‌లో వరుస డిఫెన్స్‌తో ఆస్ట్రేలియా బౌలర్ల సహనాన్ని పరీక్షించిన పుజారా.. ఏ దశలోనూ సాహసోపేత షాట్‌కి ప్రయత్నించలేదు. ఎంతలా అంటే? పుజారా తన మొదటి బౌండరీని 148 బంతికిగానీ కొట్టలేదు. అతని ఇన్నింగ్స్‌లో మొత్తం రెండు బౌండరీలు ఉండగా.. అవి కూడా బ్యాక్ టు బ్యాక్ స్పిన్నర్ నాథన్ లయన్ బౌలింగ్‌లో కొట్టినవే.

డీఆర్‌ఎస్‌కి వెళ్లిన ఆస్ట్రేలియా

నాథన్‌ లైయన్‌ బౌలింగ్‌లో రెండు ఫోర్లు కొట్టిన చెటేశ్వర్ పుజారా.. అతని ఓవర్‌లోనే అనూహ్యరీతిలో వికెట్ ఇచ్చేశాడు. బంతిని డిఫెన్స్ చేసేందుకు పుజారా ప్రయత్నించగా.. ఊహించని విధంగా బౌన్స్ అయిన బంతి అతని చేతి గ్లోవ్స్‌ని తాకి నేరుగా వెళ్లి ఫీల్డర్ లబుషేన్ చేతుల్లో పడింది. అయితే ఫీల్డ్ అంపైర్ మాత్రం తొలుత ఔట్ ఇవ్వలేదు. కానీ డీఆర్‌ఎస్‌కి వెళ్లిన ఆస్ట్రేలియా ఎట్టకేలకి పుజారా వికెట్‌ని దక్కించుకోగలిగింది. అయితే పుజారా ఆటతీరుపై సోషల్‌ మీడియాలో ఫన్నీ ట్రోల్స్‌ వస్తున్నాయి. 'అసలైన టెస్టు క్రికెటర్‌ అంటే పుజారానే' అని ఒకరు ట్వీట్ చేయగా.. 'మా పుజారా సిమెంట్..‌ అంబుజా సిమెంట్‌ కంటే దృడంగా ఉంటుంది' అని మరొకరు ట్వీటారు. 'పుజారా కట్టే గోడ.. ద్రవిడ్‌ గోడ కన్నా బలంగా ఉంటుంది', 'ద్రవిడ్‌ తర్వాత మాకు మరో వాల్‌ దొరికాడు' అంటూ అభిమానులు కామెంట్లు పెడుతున్నారు.

Year Ender 2020: చిచ్చు పెట్టిన ఆస్ట్రేలియా జ‌ర్న‌లిస్ట్‌.. గొడవపడిన కోహ్లీ, రోహిత్‌ ఫ్యాన్స్!!