పాంటింగ్ తొలి స్పీచ్ అదిరిపోయింది, ఏ ఒక్కరినీ వదిలిపెట్టలేదు

రోమాలు నిక్కబొడుచుకునేలా:

రెండు సార్లు ఆస్ట్రేలియాకు ప్రపంచ కప్‌ అందించిన మాజీ కెప్టెన్ రికీ పాంటింగ్‌పై ఢిల్లీ డేర్‌ డెవిల్స్‌ ఆటగాడు శ్రేయస్‌ అయ్యర్‌ ప్రశంసల జల్లు కురిపించారు. ఈ ఐపీఎల్‌ సీజన్‌కు రికీ పాంటింగ్‌ ఢిల్లీ జట్టుకు ప్రధాన కోచ్‌గా వ్యవహరిస్తున్న విషయం తెలిసిందే. పాంటింగ్‌ జట్టుతో చేరిన అనంతరం జరిగిన తొలి సమావేశంలో ఆటగాళ్ల రోమాలు నిక్కబొడుచుకునేలా ప్రసంగించాడని అయ్యర్‌ తెలిపారు.

ప్రధానాంశంగా ఇదే చెప్పి:

ఆటలో గెలవడం ఎంతో ముఖ్యమని, వ్యక్తిగత ప్రదర్శన కాకుండా జట్టు ప్రయోజనాలను దృష్టిలో ఉంచుకొని ఆడాలని ప్రతీ ఆటగాడికి పాంటింగ్‌ సూచించాడన్నారు. జట్టులోని ఆటగాళ్ల లోపాలను నిర్మోహటంగా వివరిస్తున్నాడన్నారు.

2015లాగే 2018లోనూ:

పాంటింగ్‌ మెంటార్‌గా ఉన్న సమయంలో ముంబై ఇండియన్స్‌ ఐపీఎల్‌ 2015 విజేతగా నిలిచిందని, ఇప్పుడు ఢిల్లీ ఐపీఎల్‌ 2018 విజేతగా నిలిచి తీరుతుందనే నమ్మకాన్ని అయ్యర్‌ వ్యక్తం చేశాడు. ఇక డేర్‌డెవిల్స్‌ మాజీ కోచ్‌ ద్రవిడ్‌పై కూడా ఈ ఆటగాడు తన అభిమానాన్ని చాటాడు.

వాళ్లిద్దరూ ఒకే తీరు:

ద్రవిడ్‌, పాంటింగ్‌లిద్దరూ ఒకే మైండ్‌ సెట్‌ గలవారని, ఓటమిని అంత తేలిగ్గా ఒప్పుకోరని వెల్లడించారు. కోల్‌కత నైట్‌రైడర్స్‌కు రెండు సార్లు కప్‌ అందించిన గొప్ప సారథి గౌతం గంభీర్‌ అని ప్రస్తుతం అతని నాయకత్వంలోని ఢిల్లీ ఈ సారి ఐపీఎల్‌లో ఫేవరెట్‌గా బరిలో దిగుతుందన్నారు. సీనియర్లు, జూనియర్లతో జట్టు పటిష్టంగా ఉందని, ఆటగాళ్లందరూ గెలవాలనే పట్టుదలతో ఉన్నారని, ఇది జట్టుకు ఎంతగానో ఉపయోగపడుతుందని అయ్యర్‌ అభిప్రాయపడ్డారు.