Click it and Unblock the Notifications
గంభీర్ తప్పుకోగా.. శ్రేయాస్ అయ్యర్‌కి
వరుస ఓటములకి బాధ్యత వహిస్తూ బుధవారం జట్టు కెప్టెన్సీ బాధ్యతల నుంచి గౌతమ్ గంభీర్ తప్పుకోగా.. యువ బ్యాట్స్‌మెన్ శ్రేయాస్ అయ్యర్‌కి నాయకత్వ బాధ్యతలను ఢిల్లీ ఫ్రాంఛైజీ అప్పగించింది. టోర్నీలో భాగంగా శుక్రవారం రాత్రి 8 గంటలకి కోల్‌కతాతో సొంత మైదానం ఫిరోజ్ షా కోట్లలో ఢిల్లీ మ్యాచ్ ఆడనుంది.
ప్రతి మ్యాచ్‌లో సత్తాచాటాల్సి
ఇప్పటికే మూడు జట్లు పది పాయింట్లతో ప్లేఆఫ్‌కి చేరువవుతుండగా.. ప్రస్తుతం ఒక విజయంతో రెండు పాయింట్లతో ఉన్న ఢిల్లీ జట్టు ప్లేఆఫ్ ఆశలు నిలుపుకోవాలంటే.. ప్రతి మ్యాచ్‌లో సత్తాచాటాల్సి సంక్లిష్ట పరిస్థితి నెలకొంది. టోర్నీ ఆరంభం నుంచి ఒక్క మ్యాచ్ మినహా.. బ్యాటింగ్, బౌలింగ్, ఫీల్డింగ్‌లో నిరాశపరుస్తున్న ఢిల్లీ జట్టు.. మళ్లీ సొంతగడ్డపై విజయంతో పుంజుకోవాలని ఆశిస్తోంది.
ఫర్వాలేదనిపించిన ఆవేశ్ ఖాన్
బ్యాటింగ్‌లో జేసన్ రాయ్, రిషబ్ పంత్, శ్రేయాస్ అయ్యర్ మినహా ఎవరూ ఇంతవరకూ చెప్పుకోదగ్గ ప్రదర్శన చేయలేదు. హిట్టర్లు మాక్స్‌వెల్.. ఓపెనర్ గంభీర్, ఆల్‌రౌండర్ విజయ్ శంకర్ ఫామ్‌‌లేమీతో ఇబ్బంది పడుతున్నారు. బౌలింగ్‌లో మాత్రం బెంగళూరుతో ఇటీవల జరిగిన మ్యాచ్‌లో ఫ్లంకెట్, అవేష్ ఖాన్ ఫర్వాలేదనిపించారు.
మెరుగైన ప్రదర్శనతో కోల్‌కతా నైట్‌రైడర్స్‌
మరోవైపు టోర్నీ ఆరంభం నుంచి కోల్‌కతా నైట్‌రైడర్స్‌ మెరుగైన ప్రదర్శనతో ఆకట్టుకుంటోంది. ఇప్పటి వరకు ఆరు మ్యాచ్‌లాడిన ఆ జట్టు మూడు మ్యాచ్‌ల్లో గెలుపొంది ప్రస్తుతం పాయింట్ల పట్టికలో నాలుగో స్థానంలో కొనసాగుతోంది. ఓపెనర్ క్రిస్‌లిన్, హిట్టర్లు రాబిన్ ఉతప్ప, నితీశ్ రానా, ఆండ్రీ రసెల్ ఫామ్‌లో ఉండటం ఆ జట్టుకి కలిసొచ్చే అంశం. బౌలింగ్‌లోనూ సునీల్ నరైన్, కుల్దీప్ యాదవ్‌లు చక్కగా రాణిస్తున్నారు. గత శనివారం టోర్నీలో చివరి మ్యాచ్ ఆడిన కోల్‌కతాకి ఆరు రోజులు విశ్రాంతి దొరకడంతో.. ఆటగాళ్లు ఉత్సాహంగా బరిలోకి దిగనున్నారు.
