మేం ఇంకాస్త బాగా ఆడాల్సి ఉంది
మ్యాచ్ అనంతరం ధోని మాట్లాడుతూ ‘మేం ఇంకాస్త బాగా ఆడాల్సి ఉంది. రెండో ఇన్నింగ్స్లో వికెట్ చాలా నెమ్మదించింది. దానికి తోడు ఢిల్లీ బౌలర్లు ఎంతో కట్టుదిట్టంగా బౌలింగ్ చేశారు. అయినా వికెట్ ఎలా ఉంటుందో ముందుగానే ఊహించడం కష్టం. ఒక్కోసారి మనకు అనుకూలంగా ఉంటుంది. మరోసారి ఇదిగో ఇలా రివర్స్ అవుతుంది' అని ధోని అన్నాడు.
డెత్ ఓవర్లలో బౌలింగ్ మెరుగుపడాలి
'ఓపెనర్లపై పూర్తిగా ఆధారపడకుండా మిడిలార్డర్ రాణించాల్సి ఉంది. ఈ టోర్నమెంట్లో ఇప్పటివరకూ ఎక్కువ మంది బ్యాట్స్మెన్ల సేవలను వినియోగించుకోలేదు. రానున్న మ్యాచ్లలో వారికి అవకాశం లభించవచ్చు. కాబట్టి అందుకు వారు అన్ని రకాలుగా సిద్దంగా ఉండాలి. డెత్ ఓవర్లలో బౌలింగ్ బాగా మెరుగుపడాల్సి ఉంది' అని ధోని అభిప్రాయం వ్యక్తం చేశాడు.
ఇప్పటికే ప్లేఆఫ్ చేరిన చెన్నై
ఈ సీజన్లో ఇప్పటికే ప్లేఆఫ్ చేరిన చెన్నై సూపర్ కింగ్స్ జట్టుకు ఈ ఓటమి ఊహించని షాకే. ఇప్పటికే ప్లేఆఫ్ రేసు నుంచి నిష్క్రమించిన ఢిల్లీ జట్టు చెన్నైపై అద్భుత విజయాన్ని నమోదు చేసింది. దీంతో 18 పాయింట్లతో సన్రైజర్స్ హైదరాబాద్ టాప్లో ఉండగా, చెన్నై సూపర్ కింగ్స్ 16 పాయింట్లతో రెండో స్థానంలో కొనసాగుతోంది.
ధోని జట్టుకు నిరాశే
అయితే రన్రేట్ ప్రకారం సీఎస్కే మెరుగైన స్థానంలో ఉండటంతో ఢిల్లీతో జరిగే మ్యాచ్లో గెలిచితే టాప్ ప్లేస్ను ఆక్రమించాలని ఆశించిన ధోని జట్టుకు నిరాశే మిగిలింది. ఈ మ్యాచ్లో తొలుత బ్యాటింగ్ చేసిన ఢిల్లీ హర్షల్ పటేల్ (36 నాటౌట్), విజయ్ శంకర్ (36 నాటౌట్) రాణించడంతో నిర్ణీత 20 ఓవర్లలో 5 వికెట్ల నష్టానికి 162 పరుగులు చేసింది. అనంతరం బ్యాటింగ్కు దిగిన చెన్నై సూపర్ కింగ్స్ను బౌలర్లు సమష్టిగా రాణించి 128/6కే పరిమితం చేశారు.