ఆసీస్‌పై విజయం.. టీమిండియాపై ప్రశంసల వర్షం

ప్రపంచకప్‌లో భాగంగా ఆదివారం లండన్‌లోని ఓవల్‌ మైదానం వేదికగా ఆస్ట్రేలియాతో జరిగిన మ్యాచ్‌లో భారత్‌ 36 పరుగుల తేడాతో విజయకేతనం ఎగురవేసింది. ముందుగా బ్యాటింగ్‌కు దిగిన భారత్‌ నిర్ణీత 50 ఓవర్లలో 5 వికెట్ల నష్టానికి 352 పరుగులు చేసింది. శిఖర్‌ ధావన్‌ (109 బంతుల్లో 117; 16 ఫోర్లు) సెంచరీ చేయగా.. విరాట్‌ కోహ్లీ(77 బంతుల్లో 82; 4 ఫోర్లు, 2 సిక్సర్లు), రోహిత్‌ శర్మ (70 బంతుల్లో 57; 3 ఫోర్లు, 1 సిక్స్‌), హార్దిక్‌ పాండ్యా (27 బంతుల్లో 48; 4 ఫోర్లు, 3 సిక్సర్లు)లు రాణించారు.

ఐసీసీ క్రికెట్ వరల్డ్‌కప్-2019 ప్రత్యేక వార్తల కోసం

అనంతరం లక్ష్య ఛేదనలో ఆస్ట్రేలియా 50 ఓవర్లలో 316 పరుగులకు ఆలౌటైంది. స్టీవ్‌ స్మిత్‌ (70 బంతుల్లో 69; 5 ఫోర్లు, 1 సిక్స్‌), డేవిడ్‌ వార్నర్‌ (84 బంతుల్లో 56; 5 ఫోర్లు), అలెక్స్‌ క్యారీ (35 బంతుల్లో 55 నాటౌట్‌; 5 ఫోర్లు, 1 సిక్స్‌)లు అర్ధ సెంచరీలు చేశారు. బుమ్రా, భువనేశ్వర్‌ చెరో 3 వికెట్లు తీశారు. అన్ని విభాగాల్లో రాణించి పటిష్ట ఆసీస్‌పై విజయం విజయం సాధించడంతో సామాజిక మాధ్యమాల్లో టీమిండియాపై ప్రశంసల వర్షం కురుస్తోంది.

మరోవైపు ఆస్ట్రేలియాతో మ్యాచ్‌లో కెప్టెన్ విరాట్ కోహ్లీ గొప్ప పరిణతి చూపించాడని దిగ్గజ క్రికెటర్లు ప్రశంసలు కురిపిస్తున్నారు. అంతర్జాతీయ మ్యాచ్‌లో క్రీడాస్ఫూర్తిని ప్రదర్శించి అందరికీ ఆదర్శంగా నిలిచాడని కొనియాడుతున్నారు. ఆస్ట్రేలియా మాజీ కోచ్ డారెన్ లీమ‌న్‌.. మాజీ క్రికెటర్లు మైఖేల్ వాన్, ఆకాశ్ చోప్రా త‌ద‌త‌రులు అభినంద‌న‌లు తెలుపుతున్నారు. ఇక సోషల్ మీడియాలో విరాట్‌ను అభినందిస్తూ నెటిజన్లు పోస్ట్‌లు, ట్వీట్లను పెడుతున్నారు