సెంచరీతో చెలరేగిన ఫించ్, మార్ష్
ఆసీస్ బ్యాట్స్మన్లలో ఓపెనర్ ఆరోన్ ఫించ్ (100), షాన్ మార్ష్ (101) సెంచరీలు నమోదు చేయగా, ట్రావిస్ హెడ్ (63) పరుగులతో హాఫ్ సెంచరీని నమోదు చేశాడు. ఇంగ్లాండ్ బౌలర్లలో విల్లీ నాలుగు వికెట్లు తీసుకోగా, వుడ్, ఆదిల్ రషీద్లు తలో రెండు వికెట్లు తీసుకున్నారు. అనతంరం 311 పరుగుల భారీ లక్ష్యంతో బరిలోకి దిగిన ఇంగ్లాండ్కు ఓపెనర్లు చక్కటి ఆరంభాన్నిచ్చారు.
జాసన్ రాయ్ సెంచరీ
జాసన్ రాయ్(101; 83 బంతుల్లో 12 ఫోర్లు, 2 సిక్సర్లు) సెంచరీతో చెలరేగగా, మరో ఓపెనర్ బెయిర్స్టో (79; 66 బంతుల్లో 10 ఫోర్లు) రాణించాడు. దీంతో తొలి వికెట్కు 174 పరుగుల భాగస్వామ్యాన్ని నమోదు చేశారు. తొమ్మిది పరుగుల వ్యవధిలో ఓపెనర్ల వికెట్లు కోల్పోయినప్పటికీ ఆ తర్వాత బరిలోకి దిగిన మిగతా బ్యాట్స్మన్ రాణించారు.
29 బంతుల్లో బట్లర్ 54
చివర్లో జోస్ బట్లర్ (54; 29 బంతుల్లో 9ఫోర్లు, 1 సిక్సర్) చెలరేగటంతో మరో 32 బంతులు మిగిలుండగానే ఇంగ్లాండ్ భారీ లక్ష్యాన్ని ఛేదించింది. ఆసీస్ బౌలర్లలో అగర్ రెండు వికెట్లు తీసుకోగా.. స్టాన్లేక్, లియాన్లు తలో వికెట్ సాధించారు. ఈ క్రమంలో ఇంగ్లాండ్ జట్టు పలు రికార్డులను నమోదు చేసింది. ఛేజింగ్ పరంగా(312పరుగుల) ఇంగ్లాండ్కు ఆస్ట్రేలియాపై ఇదే అతిపెద్ద విజయం కావడం విశేషం.
ఇంగ్లాండ్ అరుదైన రికార్డు
2008లో ఇంగ్లాండ్ చేసిన 308 పరుగల ఛేదనే ఇప్పటివరకు అత్యుత్తమం. దీంతో పాటు ఒక క్యాలెండ్ ఇయర్లో ఆస్ట్రేలియాతో ఆడిన 9 వన్డేల్లో ఇంగ్లాండ్ ఎనిమిది విజయాలు సాధించింది. టోర్నీలో భాగంగా ఇరు జట్ల మధ్య ఆదివారం చివరి వన్డే జరగనుంది. ఈ వన్డేలో గనుక విజయం సాధిస్తే ఒక క్యాలెండర్ ఇయర్లో అత్యధిక విజయాల రికార్డును ఇంగ్లాండ్ తిరగరాయనుంది.