55 బంతుల్లో 88: క్రిస్‌లిన్ విధ్వంసం, ఈ సీజన్‌లో బ్రిస్బేన్ రెండో విజయం

హైదరాబాద్: ఆస్ట్రేలియాలో ప్రస్తుతం జరుగుతున్న బిగ్ బాష్ లీగ్(బీబీఎల్)లో క్రిస్ లిన్ విధ్వంసకర ఇన్నింగ్స్‌లు ఆడుతున్నాడు. ఈ లీగ్‌లో బ్రిస్బేన్‌ హీట్‌ జట్టుకు కెప్టెన్‌గా వ్యవహరిస్తున్న క్రిస్ లిన్ శుక్రవారం హోబార్ట్‌ హరికేన్స్‌తో జరిగిన మ్యాచ్‌లో మెరుపు ఇన్నింగ్స్ ఆడాడు.

55 బంతుల్లో 11 ఫోర్లు, 3 సిక్సర్ల సాయంతో అజేయంగా 88 పరుగులు చేసి జట్టు విజయంలో కీలకపాత్ర పోషించాడు. ఈ మ్యాచ్‌లో ఫస్ట్‌ డౌన్‌లో బ్యాటింగ్‌కు వచ్చిన క్రిస్ లిన్ వచ్చీ రావడంతోనే ప్రత్యర్థి జట్టు బౌలర్లపై విరుచుకుపడ్డాడు. ఓపెనర్ మ్యాక్స్‌ బ్రయాంట్‌(65)తో కలిసి 95 పరుగుల్ని జోడించాడు.

వీరిద్దరూ మరింత దూకుడుగా ఆడటంతో పరుగుల వరద పారింది. ఆ తర్వాత క్రీజులోకి వచ్చిన మ్యాట్‌ రెన్‌షాతో కలిసి క్రిస్ లిన్ మెరుపులు మెరిపించాడు. రెన్‌ షా 17 బంతుల్లో 1 ఫోర్‌, 2 సిక్సర్ల సాయంతో 30 పరుగులు చేయడంతో బ్రిస్బేన్‌ నిర్ణీత 20 ఓవర్లలో మూడు వికెట్లు కోల్పోయి 212 పరుగులు చేసింది.

అనంతరం భారీ లక్ష్యంతో బరిలోకి దిగిన హోబర్ట్ హరికేన్స్‌ 20 ఓవర్లలో 9 వికెట్లు కోల్పోయి 181 పరుగులకే పరిమితమైంది. దీంతో బ్రిస్బేన్‌ 31 పరుగుల తేడాతో విజయం సాధించింది. ఈ సీజన్‌లో బ్రిస్బేన్‌కు ఇది రెండో విజయం కావడం విశేషం. అంతకముందు సిడ్నీ సిక్సర్స్‌తో జరిగిన తొలి మ్యాచ్‌లో విజయం సాధించింది.

తొలి మ్యాచ్‌లో కూడా క్రిస్ లిన్ 35 బంతుల్లో 4 ఫోర్లు, 11 సిక్సర్లతో 94 పరుగులు చేసి విజయంలో కీలక పాత్ర పోషించాడు. కాగా, క్రిస్ లిన్‌ ఈ ఏడాది ఐపీఎల్‌లో ముంబై ఇండియన్స్ జట్టుకు ప్రాతినిథ్యం వహించనున్నాడు. డిసెంబర్‌లో జరిగిన వేలంలో అతడికి ముంబై ఇండియన్స్ కనీస ధర రూ.2 కోట్లకు కొనుగోలు చేసింది.