నొప్పి పెరగకూడదనే భారీ షాట్లు ఆడా: హర్మన్‌ప్రీత్

క్రమంగా దూకుడు పెంచిన హర్మన్‌..

ఆరంభంలో ఆచితూచి ఆడుతూ వచ్చిన హర్మన్‌.. క్రమంగా దూకుడు పెంచింది. దానికి కారణం లేకపోలేదు. ఒక దశలో ఆమె క్రీజు వదిలి బయటికి వస్తూ భారీ షాట్లు ఆడింది. ఈ క్రమంలో చివరి ఓవర్‌లో సెంచరీ పూర్తి చేసుకుంది.

భారీ షాట్లు ఆడటానికి కారణం చెప్తూ...

‘మ్యాచ్‌కు ముందు రోజు కడుపు నొప్పితో కాస్త ఇబ్బంది పడ్డాను. మ్యాచ్‌ ఆరంభానికి ముందు కొంచెం పరవాలేదనిపించినా.. మైదానంలోకి వచ్చి పరుగులు తీయడం ఆరంభించాక పరిస్థితి మారిపోయింది. ఒక్కసారిగా కడుపు వద్ద కండరాలు పట్టేశాయి. ఫిజియో వచ్చి చికిత్స చేసి ఎక్కువసేపు పరిగెత్తితే.. నొప్పి తీవ్రతరం అయ్యే అవకాశం ఉందని పేర్కొన్నారు.

భారీ షాట్లు ఆడాలని నిర్ణయించుకున్నా

ఈ క్రమంలో దీనికి ప్రత్యామ్నాయంగా భారీ షాట్లు ఆడాలని నిర్ణయించుకున్నాను. ఇదే విషయాన్ని సహచరురాలైన రోడ్రిగ్స్‌కి వివరించి.. నువ్వు నాకు స్ట్రయికింగ్‌ ఇస్తే.. నేను భారీ షాట్లు కొడతానని చెప్పాను. దానికి ఆమె సహకరించడంతో చివరి వరకూ అదే జోరు కొనసాగించాను. ఈ క్రమంలో నేను ఎన్ని పరుగులు తీస్తున్నా అనే విషయం పట్టించుకోలేదు గెలవడానికి ఎన్ని పరుగులు కావాలో అనే విషయమే ఆలోచించాను.

150కే పరిమితమైతే.. మ్యాచ్‌ గెలవలేమని

ఒకవేళ మేము 150పరుగులకే పరిమితమైతే.. మ్యాచ్‌ గెలవలేమని నిర్ణయించుకున్నాం. ఎందుకంటే వాళ్ల జట్టులో పరుగుల వరద పారించగల ప్లేయర్లు ఉన్నారు.. ముఖ్యంగా సుజీ బేట్స్‌ లాంటి స్టార్‌ బ్యాట్స్‌వుమెన్‌ ముందు ఆ లక్ష్యం చాలా చిన్నదైపోతుందని ఊహించాం. అందుకే ముందు నిలదొక్కుకొని తర్వాత నుంచి భారీ స్కోరు సాధించవచ్చని అనుకున్నాను.