నాలుగో స్థానంలో కోహ్లీ!: తెరపైకి కొత్త విషయాన్ని తీసుకొచ్చిన గవాస్కర్

కోహ్లీ నాలుగో స్థానంలో.. స్పందించిన గవాస్కర్

తాజాగా దీనిపై మాజీ దిగ్గజ క్రికెటర్ సునీల్ గవాస్కర్ స్పందించారు. ఫిబ్రవరి 24 నుంచి ఆస్ట్రేలియాతో టీమిండియా రెండు టీ20లు, ఐదు వన్డేల సిరీస్ ఆడనుంది. వరల్డ్ కప్ ముంగిట టీమిండియాకు ఇదే చివరి సిరిస్ కావడంతో జట్టు మేనేజ్‌మెంట్ ఈ సిరిస్‌లో బ్యాటింగ్ ఆర్డర్‌లో ప్రయోగాలు చేసే అవకాశం ఉంది. ఈ నేపథ్యంలో గవాస్కర్ ఇండియూ టుడేకి ఇచ్చిన ఇంటర్యూలో మాట్లాడుతూ "ప్రపంచంలో అత్యుత్తమ బ్యాట్స్‌మెన్‌గా ఉన్న కోహ్లీకి బ్యాటింగ్ ఆర్డర్‌లో రక్షణ ఏమీ అవసరం లేదు" అని చెప్పుకొచ్చాడు.

ఒక్కోసారి స్వింగ్‌కి అతిగా అనుకూలిస్తాయి

"అయితే, ఇంగ్లాండ్ పిచ్‌లు ఒక్కోసారి స్వింగ్‌కి అతిగా అనుకూలిస్తాయి. అలాంటి సమయాల్లో భారీ లక్ష్యఛేదనకు దిగి.. ఆరంభంలోనే వికెట్ చేజార్చుకుంటే? విరాట్ కోహ్లీ వికెట్‌ను కాపాడుకోవాల్సిన బాధ్యత టీమిండియాపై ఉంటుంది. అలాంటి సందర్భాల్లో కోహ్లీని నెం.3లో కాకుండా.. నాలుగో స్థానంలో బ్యాటింగ్‌కు పంపించాలి" అని గవాస్కర్ సూచించాడు.

ప్రమాదకరంగా పేసర్లు

స్వింగ్‌కి అనుకూలించే సమయాల్లో పేసర్లు ప్రమాదకరంగా కనిపిస్తారు. అలాంటి ప్రత్యేకమైన పరిస్థితుల్లో బంతి పాతబడే వరకూ బ్యాట్స్‌మెన్ క్రీజులో నిలవడం కష్టంతో కూడుకున్న పని. ఒకవేళ కోహ్లీ ఆ సమయంలో మూడో స్థానంలో బ్యాటింగ్‌కి వెళ్లి వికెట్ చేజార్చుకుంటే భారత్ ఒత్తిడిలో పడుతుందని అని గవాస్కర్ వెల్లడించాడు.

నెం.3లో 32 సెంచరీలు సాధించిన కోహ్లీ

వన్డేల్లో సుదీర్ఘకాలంగా మూడో స్థానంలో ఆడుతున్న టీమిండియా కెప్టెన్ విరాట్ కోహ్లీ ఇప్పటి వరకూ 59.50 యావరేజితో 10,533 పరుగులు చేశాడు. ఇందులో 39 సెంచరీలు ఉండగా... అందులో 32 సెంచరీలు మూడో స్థానంలో ఆడి చేసినవే కావడం విశేషం.