|
జంపాకు ఇవ్వాల్సింది..
ప్లేయర్ ఆఫ్ ద టోర్నమెంట్ వార్నర్కు దక్కడంపై ఆసీస్ కెప్టెన్ ఆరోన్ ఫించ్ సైతం ఆసక్తికర వ్యాఖ్యలు చేశాడు. ఈ అవార్డు బౌలర్ ఆడమ్ జంపాకు దక్కాల్సిందని అభిప్రాయపడ్డాడు. జంపా.. కీలక మ్యాచ్లలో ప్రత్యర్థులకు పరుగులు చేయకుండా కట్టడి చేశాడని పేర్కొన్నాడు. చాలా గర్వంగా ఉంది. టీ20 ప్రపంచకప్ సాధించిన ఆస్ట్రేలియా తొలి జట్టుగా మేము నిలిచాం. టైటిల్ సాధించడం అంత తేలికైన విషయం కాదు అని మాకు తెలుసు. వ్యక్తిగతంగా, సమష్టిగా ప్రతీ ఒక్కరు అద్భుత ప్రదర్శన కనబరిచి ఇక్కడి దాకా చేరుకున్నాం. వార్నర్ పని అయిపోయిందంటూ చాలా మంది చాలా రకాలుగా రాశారు. నిజానికి అలాంటి సమయాల్లోనే అతను అత్యుత్తమ ప్రదర్శన కనబరుస్తాడు. అయితే నా దృష్టిలో మాత్రం జంపా ప్లేయర్ ఆఫ్ ది టోర్నమెంట్. మార్ష్ ఈరోజు అద్భుతంగా ఆడాడు. వేడ్ గాయం కారణంగా ఇబ్బంది పడగా స్టొయినిస్ తన పనిని పూర్తి చేశాడు''అని ఆరోన్ ఫించ్ చెప్పుకొచ్చాడు. ఆడమ్ జంపా.. మొత్తం టోర్నీలో 13 వికెట్లు పడగొట్టాడు. ఆస్ట్రేలియా విజయాల్లో కీలక పాత్ర పోషించాడు.
మ్యాన్ ఆఫ్ ది టోర్నీ ‘టాసే’!
బాబర్ ఆజామ్, ఆడమ్ జంపాలకు ఇవ్వాల్సిందని క్రికెటర్లు అంటుంటే.. అభిమానులు మాత్రం టాస్కివ్వాలని సెటైర్లు పేల్చుతున్నారు. 'టీ20 ప్రపంచకప్ 2021 కన్నా 'చిత్తు బొత్తు'ఆట నయం' మెగా టోర్నీని ఉద్దేశించి ఓ అభిమాని చేసిన ట్వీట్! దుబాయ్ వేదికగా జరిగిన ఈ మెగాటోర్నీ ఫలితాలను చూస్తుంటే ఆ అభిమాని చెప్పినట్లు ఇది క్రికెట్ టోర్నీనా? లేక చిత్తు బొత్తు ఆటనా? అనే సందేహం కలుగుతోంది. మ్యాచ్ ఫలితాన్ని టాస్ అంతగా శాసించింది. హాట్ ఫేవరేట్ బరిలోకి దిగిన టీమిండియా ఇంటి దారి పట్టడానికి.. లీగ్ దశలో దుమ్మురేపి నాకౌట్ చేరిన ఇంగ్లండ్, పాకిస్థాన్ టైటిల్ ఫైట్కు చేరుకుండా వెనుదిరగడానికి.. ఏ మాత్రం అంచనాల్లేకుండా బరిలోకి దిగిన ఆస్ట్రేలియా టైటిల్ గెలిచిందనడానికి ప్రధానం కారణం 'టాస్'! అంతలా మ్యాచ్ ఫలితాన్ని శాసించింది. దాంతో యూఏఈ పిచ్లపై సర్వత్రా విమర్శలు వ్యక్తమవుతున్నాయి.
టాస్ గెలిస్తే గెలిచినట్లే..
యూఏఈలోని పిచ్లు మొదట బ్యాటింగ్కు కఠినంగా ఉన్నాయి. ముఖ్యంగా రాత్రి పూట మ్యాచ్ల్లో అయితే మంచు ప్రభావం కారణంగా ఛేదన చేసే జట్టుకే ఎక్కువ విజయాలు దక్కాయి. టీ20 ప్రపంచకప్లో సూపర్-12 దశ నుంచి ఫైనల్ మ్యాచ్ వరకు 23 మ్యాచ్లు జరగ్గా .. 18 సార్లు చేజింగ్ టీమ్సే గెలుపొందాయి. ఇందులో 15 సార్లు టాస్ గెలిచిన జట్లు ఉన్నాయి. ఇక రాత్రి పూట 13 మ్యాచ్లకు గాను పన్నెండు సార్లు ఛేదన చేసిన జట్లనే విజయం వరించింది. రెండో ఇన్నింగ్స్లో బ్యాటింగ్ సులువుగా మారుతుండడంతో టాస్ గెలిచిన జట్లు మరో ఆలోచన లేకుండా బౌలింగ్కే మొగ్గు చూపాయి. టీ20 ప్రపంచకప్ చాంపియన్గా నిలిచిన ఆస్ట్రేలియా కూడా సూపర్ -12 దశలో ఇంగ్లండ్తో మ్యాచ్లో మొదట బ్యాటింగ్లో ఎలా తడబడిందో చూశాం. దాంతో టాస్ గెలిస్తే మ్యాచ్ గెలిచినట్లే అనే భావన అందరిలో ఏర్పడింది.