ఐపీఎల్ 12 ముంబై ఇండియన్స్‌దే: 1 పరుగు తేడాతో విజయం, ఎవరేమన్నారు?

రోహిత్ శర్మ

ముంబై విజయం జట్టు అందరిది. ఈ టోర్నీలో బౌలర్లు గొప్పగా రాణించారు. కీలక సమయాల్లో సత్తా చాటారు. ఒక ఛాంపియన్‌ బౌలర్‌ ఏం చేయాలో మలింగ అదే చేశాడు. శార్దూల్‌ ఠాకూర్‌ ఎలా ఆడతాడో నాకు తెలుసు. అందుకే స్లో యార్కర్‌ వేయమని మలింగకు చెప్పా. సరిగ్గా అతను అలాగే చేశాడు. గతంలో ఇలాంటి ఎన్నో మ్యాచ్‌లాడిన చాంపియన్‌ ఆటగాడు మలింగపై నాకు నమ్మకం ఉంది. అందుకే అతనికి చివరి ఓవర్‌ ఇచ్చా. అది ఫలితాన్నిచ్చింది. ముందుగా ప్రణాళిక వేసుకున్నట్టుగా మేం టోర్నీని రెండు భాగాలుగా విభజించి ఆడడం కలిసొచ్చింది. ఈ సీజన్‌లో మా బౌలింగ్‌ అద్భుతం. ప్రతి బౌలర్‌కూ నిరూపించుకునేందుకు అవకాశం దక్కింది. ఈ ఘనత అంతా నాది కాదు. నేను కేవలం ఆటగాళ్ల ప్రతినిధిని మాత్రమే.

మహేంద్ర సింగ్ ధోని

జట్టుగా మేం బాగానే ఆడాం. మా బౌలర్లు చక్కగా బౌలింగ్‌ చేశారు. బ్యాటింగ్‌లో చిన్నచిన్న లోపాలున్నాయి. మా మిడిలార్డర్‌ ఈ సీజనంతా విఫలమైనా ఎలాగోలా ఫైనల్‌కు రాగలిగాం. వచ్చే సీజన్‌లో నిలకడైన ఆటతీరును ప్రదర్శించాలంటే ఏం చేయాలనే విషయమై మేం బాగా ఆలోచించాలి. ఇక అన్నింటికంటే ముఖ్యంగా వరల్డ్‌కప్‌ రాబోతోంది. దాని గురించే ఇప్పుడిక ఆలోచన అంతా.

జస్ప్రీత్ బుమ్రా

చాలా సంతోషంగా ఉంది. ఫైనల్స్‌లో చివరివరకు ఉత్కంఠభరితంగా సాగి చివర్లో విజయం సాధించడం మంచి అనుభూతినిస్తుంది. ఈరోజు నేను ఎలాంటి ఆందోళనకు గురికాకుండా చాలా కూల్‌గా ఉన్నా. జట్టు విజయంలో నా వంతు పాత్ర పోషించినందుకు చాలా సంతోషంగా ఉంది.

సచిన్ టెండూల్కర్ - ముంబై ఇండియన్స్ ఐకాన్, మెంటార్

ఈ మ్యాచ్‌లో కీ మూమెంట్ ఏదైనా ఉందంటే అది ధోని రనౌట్ అవడమే. మలింగ ఎక్కువ పరుగులు ఇచ్చినప్పటికీ ఆ తర్వాత కీలక ఓవర్లలో బుమ్రా అద్భుతంగా బౌలింగ్ చేశాడు. మరోవైపు కృనాల్ పాండ్యా ధారాళంగా పరుగులు సమర్పించుకున్నప్పటికీ... ఆ తర్వాత బుమ్రా చాలా అద్భుతంగా బౌలింగ్ వేశాడు. మలింగ ఫినిష్ చేసిన తీరు నిజంగా అద్భుతం. ఆఖరి ఓవర్‌లో మలింగ బౌలింగ్ నిజంగా అద్బుతం. గతంలో ముంబై ఇండియన్స్ అనేక ఫైనల్స్ ఆడిన అనుభవం ఈ మ్యాచ్‌లో చాలా వరకు పనికొచ్చింది. ఈ జట్టులో అటు యువతతో పాటు అనుభవం కలిగిన కుర్రాళ్లు ఉన్నారు.

లసిత్ మలింగ

మేము ఒక పరుగు ఇచ్చినట్లైతే, ఈ మ్యాచ్‌లో విజయం సాధించేవాళ్లం కాదు. ఈ మ్యాచ్‌లో గెలవాలంటే తప్పకుండా వికెటీ తీయాల్సిందే. అందుకే వికెట్‌ తీసేందుకు ఎక్కువ ప్రాధాన్యత ఇచ్చా.