ఆస్ట్రేలియా మాజీ ఆల్‌రౌండర్‌ వాట్సన్ మృతి!!

దక్షిణాఫ్రికాపై ఆరంగేట్రం:

విక్టోరియా జట్టు తరఫున గ్రేమ్ వాట్సన్ తన కెరీర్‌ని ఆరంభించారు. అద్భుతంగా ఆడుతూ 1966-67 దక్షిణాఫ్రికా పర్యటనలో ఆస్ట్రేలియా జట్టులో చోటు దక్కించుకున్నారు. కేస్‌టౌన్ వేదికగా జరిగిన టెస్ట్ మ్యాచ్‌లో అంతర్జాతీయ క్రికెట్‌లో వాట్సన్ ఆరంగేట్రం చేశారు. తొలి ఇన్నింగ్స్‌లో 50 పరుగులు చేసిన వాట్సన్.. చీలమండ గాయం కారణంగా ఆ తర్వాతి టెస్ట్‌కి దూరమయ్యారు. ఇక నాలుగో టెస్టులో వాట్సన్ తన కెరీర్‌లోనే అత్యుత్తమ ప్రదర్శన చేశారు. 67 పరుగులు ఇచ్చి రెండు వికెట్లు తీశారు కానీ.. బ్యాటింగ్‌లో మాత్రం ఆకట్టుకోలేకపోయారు. అయితే ఆస్ట్రేలియా ఆ సిరీస్‌ ఓడింది.

డాక్టర్ల సూచనతో క్రికెట్‌కు గుడ్ బై:

గ్రేమ్ వాట్సన్ కెరీర్ మొత్తం గాయాలతోనే సరిపోయింది. మెల్‌బోర్న్ వేదికగా 1971-72 మధ్యలో జరిగిన ఓ మ్యాచ్‌లో బౌలర్ టోనీ గ్రేగ్ వేసిన బంతి వాట్సన్ ముక్కుకు బలంగా తగిలింది. దీంతో డాక్టర్లు ఆయనను ఆరు వారాల విశ్రాంతి తీసుకోవాలని సూచించారు. ఆ తర్వాత కోలుకున్న వాట్సన్.. తన కెరీర్‌లో చివరి రెండు టెస్టులు, మరో రెండు వన్డేలు ఆడారు. వాట్సన్ మిడిల్-ఆర్డర్ బ్యాట్స్‌మన్‌, మీడియం పేస్ బౌలర్. తరుచూ గాయాలపాలవ్వడంతో డాక్టర్ల సూచనతో క్రికెట్‌కు గుడ్ బై చెప్పారు.

ఫస్ట్ క్లాస్ క్రికెట్‌లో మెరిసిన వాట్సన్:

గ్రేమ్ వాట్సన్ అంతర్జాతీయ క్రికెట్‌లో రాణించకున్నా.. ఫస్ట్ క్లాస్ క్రికెట్‌లో మాత్రం మెరిశారు. 1971-72లో అతను వెస్ట్రన్ ఆస్ట్రేలియాకు ఆడారు. 1971-72, 1972-73,1974-75 సీజన్లలో వెస్ట్రన్ ఆస్ట్రేలియా షెఫీల్డ్ షీల్డ్ ట్రోఫీ గెలవడంతో వాట్సన్ కీలక పాత్ర పోషించారు. 107 ఫస్ట్ క్లాస్ మ్యాచ్‌లలో 4674 పరుగులు, 186 వికెట్లు తీశారు. న్యూసౌత్ వేల్స్‌లో జరిగిన మ్యాచ్‌ అనంతరం రిటైర్ అవుతున్నట్టు ప్రకటించారు. వాట్సన్ మెల్బోర్న్ కోసం ఆస్ట్రేలియన్ రూల్స్ ఫుట్‌బాల్‌ కూడా ఆడారట. ఆ తరువాత విజయవంతమైన వాస్తుశిల్పిగా మారారని క్రికెట్.కామ్‌లోని ఒక నివేదిక పేర్కొంది.