ఫైన‌ల్ వాకిట్లో బోల్తా: టీమిండియా మ‌రో ద‌క్షిణాఫ్రికాలా మార‌బోతోందా?

లీగ్ ద‌శ‌ల్లో ఓట‌మి అనేదే లేకుండా..

ప్ర‌పంచ‌క‌ప్ టోర్న‌మెంట్‌లో ద‌క్షిణాఫ్రికా ప్ర‌స్థానం ఓ పెను సంచ‌ల‌నంగా చెప్పుకోవచ్చు. 1996లో తొలిసారిగా ప్ర‌పంచ‌క‌ప్ టోర్న‌మెంట్‌లో అడుగు పెట్టింది ద‌క్షిణాఫ్రికా జ‌ట్టు. ఆరంభంలోనే ప్ర‌కంప‌నల‌ను పుట్టించింది. హాట్ ఫేవ‌రెట్‌గా నిలిచింది. ప‌సికూలలా త‌న కేరీర్‌ను ఆరంభించిన ద‌క్షిణాఫ్రికా జ‌ట్టు.. టోర్నీ ముగిసే స‌మ‌యానికి శ‌క్తిమంతంగా ఎదిగింది. క్వార్ట‌ర్ ఫైన‌ల్స్‌లోనే తిరుగుముఖం ప‌ట్టిన‌ప్ప‌టికీ.. వ‌ర్షం వ‌ల్ల మాత్రమే ఆ జ‌ట్టు ఓడిపోయింద‌నేది నిఖార్స‌యిన నిజం. అలా ఆరంభ‌మైన ఆ జ‌ట్టు ప్ర‌స్థానం ఎప్పుడూ ఫైన‌ల్ రుచి చూడ‌లేదంటే ఆశ్చ‌ర్య‌మేస్తోంది. శాపాలు వెంటాడుతున్నాయేమోన‌నే అనుమానం క‌లుగుతుంది.

సెమీ ఫైన‌ల్‌లో ఓడిపోయే అల‌వాటు ఇప్ప‌టిది కాదు..

ఆస్ట్రేలియా, న్యూజిలాండ్ సంయుక్తంగా నిర్వ‌హించిన 2015 నాటి ప్ర‌పంచ‌కప్ టోర్న‌మెంట్‌లోనూ ద‌క్షిణాఫ్రికన్లు సెమీస్‌లోనే వెనుదిరిగిన విష‌యం తెలిసిందే. న్యూజిలాండ్‌తో జ‌రిగిన ఆ మ్యాచ్‌లో బ్లాక్ క్యాప్స్ ద‌క్షిణాఫ్రికా టీమ్‌ను మట్టి క‌రిపించారు. మ్యాచ్ ముగిసిన వెంట‌నే ఏబీ డివిలియ‌ర్స్‌, డేల్ స్టెయిన్ వంటి హేమాహేమీలు గ్రౌండ్‌లోనే కూల‌బ‌డ్డారు. క‌న్నీటి ప‌ర్యంతం అయ్యారు. సెమీస్ ద‌శ‌లో ఓడిపోవ‌డం ద‌క్షిణాఫ్రిక‌న్ల‌కు కొత్తేమీ కాదు. 2011 ప్ర‌పంచ‌క‌ప్‌లో లీగ్ ద‌శ‌లో రాణించినా, నాకౌట్ మ్యాచ్‌లో తేలిపోయింది. 1999 ప్ర‌పంచ‌క‌ప్ సెమీఫైన‌ల్‌లో ద‌క్షిణాఫ్రికా చివ‌రి ఓవ‌ర్‌లో ఓట‌మిని కొనితెచ్చ‌కున్న విష‌యాన్ని క్రికెట్ ప్రియులెవ‌రూ మ‌రిచిపోలేరు. ద‌క్షిణాఫ్రిక‌న్ల‌కు అదో పీడ‌క‌ల‌. ప్ర‌స్తుతం టీమిండియా కూడా అదే వార‌స‌త్వాన్ని కొని తెచ్చుకుంటున్న‌ట్లు క‌నిపిస్తోంది. 1

నాలుగు సెమీ ఫైన‌ల్ మ్యాచుల్లో ప‌రాజ‌యం..

గంగ కాస్తా చంద్ర‌ముఖిలా త‌యారైన‌ట్లు టీమిండియా కాస్తా క్ర‌మంగా ద‌క్షిణాఫ్రిక‌లా మారిపోతోంది. నాలుగు ప్ర‌పంచ‌క‌ప్ టోర్న‌మెంట్ల‌లో సెమీ ఫైన‌ల్‌లో ప్ర‌వేశించిన టీమిండియా.. ఒక్క అడ్డంకిని అధిగ‌మించ‌లేక‌పోయింది. 2011 ప్ర‌పంచ‌క‌ప్‌ను ఇందులో మిన‌హాయించ‌వ‌చ్చు. 1987 సెమీఫైన‌ల్ మ్యాచ్‌లో ఇంగ్లండ్ చేతిలో ప‌రాజ‌యాన్ని చ‌వి చూసింది భార‌త్‌. 1996లో సెమీఫైన‌ల్‌లో ఓట‌మి చ‌వి చూసింది. 1999లో సెమీస్ కూడా చేర‌లేకపోయింది. 2003లో ఫైన‌ల్‌లో ఆస్ట్రేలియా చేతిలో ఓట‌మిని మూట‌గ‌ట్టుకుంది. 2007లోనూ గ్రూప్ ద‌శ‌లోనే నిష్క్ర‌మించింది. 2011లో టైటిల్ విజేత‌గా నిలిచిన‌ప్ప‌టికీ.. ఆ త‌రువాత జ‌రిగిన రెండు ప్ర‌పంచ‌క‌ప్‌లల్లో సెమీస్ గండం నుంచి గ‌ట్టెక్క‌లేక చ‌తికిల ప‌డింది.