టీ20 క్రికెట్‌లో రోహిత్ శర్మ అరుదైన ఘనత

ముజీబ్‌ బౌలింగ్‌లో రోహిత్ శర్మ సిక్సర్

ఇన్నింగ్స్ 17వ ఓవర్‌లో ముజీబ్‌ ఉర్‌ రెహ్మాన్ వేసిన బంతిని రోహిత్‌ శర్మ సిక్సర్‌గా మలిచాడు. దీంతో టీ20ల్లో రోహిత్ శర్మ అన్ని టోర్నీల్లో కలిపి 301 సిక్సర్లు బాదాడు. టీ20 ఫార్మాట్‌లో అత్యధిక సిక్సర్లు బాదిన ఆటగాళ్ల జాబితాలో క్రిస్‌గేల్‌(844) అగ్ర స్థానంలో కొనసాగుతున్నాడు.

అత్యధిక సిక్సులు బాదిన ఆటగాడిగా క్రిస్ గేల్

ఆ తర్వాతి స్థానంలో కీరన్‌ పొలార్డ్‌(525), బ్రెండన్‌ మెకల్లమ్‌(445), డ్వేన్‌ స్మిత్‌(367), షేన్‌ వాట్సన్‌(357), డేవిడ్‌ వార్నర్‌ (319), రోహిత్‌ శర్మ (301) అ తర్వాతి స్థానాల్లో కొనసాగుతున్నారు. ఇప్పటివరకు ఐపీఎల్‌లో 168 మ్యాచ్‌లాడిన రోహిత్ శర్మ 4427 పరుగులు చేశాడు.

ఐపీఎల్‌లో రోహిత్‌ శర్మ అత్యధిక స్కోరు 109

ఐపీఎల్‌లో రోహిత్‌ శర్మ అత్యధిక స్కోరు 109. ఇక, ఐపీఎల్ 11వ సీజన్‌లో ముంబై ఇండియన్స్‌కు ప్రాతినిథ్యం వహిస్తోన్న రోహిత్ శర్మ 11 సిక్సులు, 21 బౌండరీలు నమోదు చేశాడు. రోహిత్ శర్మ నాయకత్వంలో ముంబై ఇండియన్స్ రెండుసార్లు ఐపీఎల్ ట్రోఫీ అందుకుంది.

ఆదివారం కోల్‌కతాతో మ్యాచ్

ఇక, అంతర్జాతీయ టీ20ల్లో 79 మ్యాచ్‌లు ఆడిన రోహిత్‌ శర్మ 1852 పరుగులు చేశాడు. వీటిలో రెండు సెంచరీలతో పాటు, 14 హాఫ్‌ సెంచరీలు కూడా ఉన్నాయి. అంతర్జాతీయ టీ20ల్లో రోహిత్‌ అత్యధిక స్కోరు 118. కాగా, టోర్నీలో భాగంగా ముంబై ఇండియన్స్ తన తదుపరి మ్యాచ్‌ని కోల్‌కతాతో తలపడనుంది. ఈ మ్యాచ్ ఆదివారం వాంఖడె స్టేడియంలో జరగనుంది.