కోహ్లీ గొప్ప ఆటగాడు, బుమ్రా బౌలింగ్ అంటే ఎంతో ఇష్టం: డెన్నిస్ లిల్లీ

నేను చూసిన వాళ్లలో కోహ్లీ ఓ గొప్ప క్రికెటర్‌

"మ్యాచ్‌లో అతడు అనుసరించే వ్యూహాలు ఎంతో బాగుంటాయి. నేను చూసిన వాళ్లలో కోహ్లీ ఓ గొప్ప క్రికెటర్‌. ఎటువంటి బౌలింగ్‌నైనా అతడు సమర్థంగా ఎదుర్కోగలడు. కోహ్లీ టెక్నిక్‌, నియంత్రణ, డెలివరీలను ఎదుర్కోవడానికి పొందే సమయం అతణ్ని గొప్ప ఆటగాణ్ని చేస్తున్నాయి" అని డెన్నిస్ లిల్లీ చెప్పాడు.

కోహ్లీ బంతిని చాలా ముందే చూస్తాడు

"కోహ్లీ బంతిని చాలా ముందే చూస్తాడు. గొప్ప బ్యాట్స్‌మెనందరిలో ఆ నాలుగు లక్షణాలు ఉంటాయి. ఆస్ట్రేలియాతో రెండో టెస్టులో అద్భుతమైన సెంచరీ చేశాడు. ప్రపంచ బ్యాట్స్‌మెన్లలో మేటిగా నిలిచాడు. అంత మంచి ఆటగాడి స్వభావం కూడా బాగానే ఉంటుదని నేను అనుకుంటున్నాను. కెప్టెన్‌కి దూకుడు అవసరం" అని అన్నాడు.

బుమ్రా బౌలింగ్ అంటే ఇష్టం

ఇక, భారత బౌలర్లలో బుమ్రా బౌలింగ్ అంటే తనకెంతో ఇష్టమని చెప్పాడు. బుమ్రా గురించి మాట్లాడుతూ "బుమ్రాకి ఆట మీద ఎంతో ఆసక్తి ఉంటుంది. అతడు తన బౌలింగ్‌తో కనికట్టు చేయగలడు. అతడి బౌలింగ్‌ అద్భుతం. భారత బౌలర్లలో అతడెంతో ప్రత్యేకం. బుమ్రాను చూసినప్పుడు నన్ను నేను చూసుకుంటున్నట్లు అనిపిస్తుంది" అని లిల్లీ అన్నాడు.

భారత్ తరుపున అత్యధిక వికెట్లు

ఇప్పటివరకు ఆస్ట్రేలియాతో ముగిసిన రెండు టెస్టుల్లో భారత్ తరుపున అత్యధిక వికెట్లు(11) తీసిన బౌలర్‌గా బుమ్రా కొనసాగుతోన్న సంగతి తెలిసిందే. ఇక, రెండో టెస్టులో టీమిండియా నలుగురు పేసర్లతో బరిలోకి దిగినప్పటికీ ఓటమిపాలవడంపై డెన్నిస్ లిల్లీ ఇది ఫాస్ట్ బౌలర్ల అంశం కాదని, ప్రస్తుతం భారత్‌లో అద్భుతమైన పేసర్లు ఉన్నారని కొనియాడాడు.